1 րոպեի ընթերցում
Աշխատանքային–ճանաչողական այցով Սինգապուրում գտնվող բարձրաստիճան պատվիրակությունը, որի կազմում է նաև Բարձրագույն դատական խորհրդի նախագահ Արթուր Աթաբեկյանը, հանդիպել է Սինգապուրի միջազգային արբիտրաժային կենտրոնի գործադիր տնօրեն Գլորիա Լիմին։
Ինչպես «Արմենպրես»-ին տեղեկացրին Բարձրագույն դատական խորհրդի, Սինգապուրի միջազգային արբիտրաժային կենտրոնը (SIAC) միջազգային վեճերի լուծման առաջատար հաստատությունների կենտրոնական հարթակ է։ Ներկայացնելով Արբիտրաժային կենտրոնի գործառույթները՝ գործադիր տնօրենը շեշտել է, որ այն տրամադրում է ժամանակակից լսարանային և տեխնոլոգիական լուծումներ արբիտրաժային լսումների, միջնորդությունների և այլ ADR (Alternative Dispute Resolution) միջոցառումների համար՝ միավորելով առաջատար իրավաբանական ընկերությունները, արբիտրաժային պալատներն ու օժանդակ ծառայությունները մեկ վայրում։
Ըստ աղբյուրի՝ հայ պատվիրակները հետաքրքրվել են միջազգային վեճերի լուծման ոլորտում քաղաքականության ձևավորման և զարգացման օրակարգով։ Զրույց է ծավալվել երկկողմ և բազմակողմ ինստիտուցիոնալ համագործակցության հնարավորությունների, համատեղ միջոցառումների, ծրագրերի իրականացման հեռանկարների շուրջ։