Երևանի քաղաքապետարանը կբողոքարկի Վարչական դատարանի՝ «կարմիր գծերի» վճարների որոշման վերաբերյալ վճիռը
2 րոպեի ընթերցում
Երևանի քաղաքապետարանը մտադիր է բողոքարկել Վարչական դատարանի մայիսի 23-ի որոշումը, որով անվավեր են ճանաչվել մայրաքաղաքում վճարովի ավտոկայանատեղիների, այսպես կոչված՝ «կարմիր գծերի» համար սահմանված տեղական վճարներին վերաբերող որոշ դրույթներ։
«Արմենպրես»-ի հաղորդմամբ՝ այս մասին «Ֆեյսբուք»-ի իր էջում գրել է քաղաքապետարանի մամուլի քարտուղար Հայկ Կոստանյանը։
Վարչական դատարանն արձանագրել էր, որ Երևանի ավագանու համապատասխան որոշման դրույթները չեն բավարարում օրենքով սահմանված չափանիշներին։ Դատարանի գնահատմամբ՝ վարչական մարմինը չի հիմնավորել վճարների բարձրացումը՝ ծառայությունների որակի բարելավման կամ օրինական այլ նպատակով։ Խախտվել են համաչափության և իրավաչափության սկզբունքները։
Հատկապես քննադատության է ենթարկվել այն հանգամանքը, որ քաղաքապետարանը չի ապացուցել՝ արդյոք վճարի ավելացումը հանգեցրել է ծառայությունների որակական փոփոխության կամ նպաստել է փողոցների բեռնաթափմանը։ Դատարանը եզրահանգել է, որ համապետական նշանակության հարցեր, ինչպիսին են երթևեկության կազմակերպումն ու անվտանգությունը, տեղական ինքնակառավարման մարմնի իրավասության շրջանակից դուրս են։
Դատական ակտով, սակայն, մերժվել է ավագանու «Մայր Հայաստան» խմբակցության կողմից ներկայացված պահանջը՝ վիճարկվող դրույթները ուժի մեջ մտնելու պահից անվավեր ճանաչելու մասին։ Սա նշանակում է, որ որոշումն ուժի մեջ է մնացել, իսկ դատական ակտի կիրառումը կսահմանափակվի ապագայի համար՝ կախված բողոքարկման ընթացքից։