385.68
Արդարադատության նախարարի տեղակալը և Քրեակատարողական ծառայության պետն այցելել են «Արմավիր» ՔԿՀ
2 րոպեի ընթերցում
ՀՀ արդարադատության նախարարի տեղակալ Գևորգ Քոչարյանը և Քրեակատարողական ծառայության պետ Ծովինար Թադևոսյանն աշխատանքային այց են իրականացրել «Արմավիր» քրեակատարողական հիմնարկ։
Ինչպես «Արմենպրես»-ին տեղեկացրին ՀՀ արդարադատության նախարարության քրեակատարողական ծառայությունից, նախարարի տեղակալը և Ծառայության պետը շրջել են հիմնարկի հիմնական տարածքներով, հանդիպել հացադուլ հայտարարած անձանց հետ, լսել նրանց մտահոգությունները, այնուհետև այցելել են տարբեր խցեր, զրուցել ազատազրկված անձանց հետ։
Աշխատանքային այցի շրջանակներում Գևորգ Քոչարյանը և Ծովինար Թադևոսյանը շրջայց են կատարել նաև հիմնարկի խոհանոցում, հետևել սննդի պատրաստման գործընթացին, ծանոթացել ճաշացանկին։
Ըստ աղբյուրի՝ այցի ընթացքում Քրեակատարողական ծառայության պետ Ծովինար Թադևոսյանը հանդիպել է ցմահ ազատազրկման դատապարտված 10 անձանց, լսել նրանց կողմից բարձրացված իրավական և անձնական բնույթի հարցերը։ Ցմահ դատապարտյալները, մասնավորապես, ներկայացրել են պատժից պայմանական վաղաժամկետ ազատման, անվտանգային գոտիների փոփոխման և բժշկական օգնության հետ կապված հարցեր։ Հանդիպման ընթացքում ցմահ դատապարտյալներին պարզաբանվել են բարձրացված հարցերի իրավական ընթացակարգերը, լուծման ուղիները, և քննարկվել է հետագա բարեփոխումների տեսլականը։
Բաժանորդագրվեք մեր ալիքին Telegram-ում