«Նոա»-ն պատմության մեջ երկրորդ անգամ դարձավ Հայաստանի գավաթակիր

Հայաստանի ֆուտբոլի գավաթի խաղարկության եզրափակիչում մրցաշրջանի վերջին տիտղոսի համար մրցեցին Պրեմիեր լիգայի նորընծա չեմպիոն «Նոա»-ն ու Հայաստանի Սուպերգավաթակիր «Արարատ-Արմենիա»-ն:

«Արմենպրես»-ի հաղորդմամբ` Վազգեն Սարգսյանի անվան Հանրապետական մարզադաշտում կայացած հանդիպումը մեկնարկեց նախատեսված ժամից 13 րոպե ուշ` տեխնիկական խոտանի պատճառով:

Հանդիպման մեկնարկում թիմերը փոխանակվում էին գրոհներով, սակայն առավել վտանգավոր գործում էր «Նոա»-ն: «Արարատ-Արմենիա»-ն հստակ էր գործում պաշտպանությունում մինչև խաղի 40-րդ րոպեն: Հակագրոհներից մեկի ժամանակ տուգանային հրապարակում արագ կողմնորոշվեց Հելդեր Ֆերեյրան: Սակայն «Արարատ-Արմենիա»-ից 3 րոպե պահանջվեց հաշվի հավասարությունը վերականգնելու համար: Դիպուկ հարվածով աչքի ընկավ Մարիուս Նուբիսին:

Երկրորդ կեսի 57-րդ րոպեին` օգտվելով Հենրի Ավագյանի սխալից, «Նոա»-ն կրկին առաջ անցավ հաշվի մեջ: Աչքի ընկավ Հելդեր Ֆերեյրան: Այս խաղակեսում գրեթե հավասար պայքար էր ծավալվում: Պրեմիեր լիգայի նորընծա չեմպիոնին հաջողվեց նաև երրորդ գնդակն ուղարկել մրցակցի դարպասը: Հեռահար հարվածով գոլը խփեց Մատեուշ Այասը:

«Նոա»-«Արարատ-Արմենիա»` 3:1:

«Նոա»-ն իր պատմության մեջ երկրորդ անգամ նվաճեց Հայաստանի գավաթը:

Լուսանկարը` «Նոա»-ի