385.68
Մարմնամարզիկ Արթուր Ավետիսյանի նպատակը Եվրոպայի առաջնության մեդալին արժանանալն է
2 րոպեի ընթերցում
Հայաստանի սպորտային մարմնամարզության հավաքականի անդամ, աշխարհի գավաթի խաղարկության 6-րդ փուլի ոսկե մեդալակիր Արթուր Ավետիսյանի նպատակը Եվրոպայի առաջնության մեդալն է:
«Ուրախ եմ այս ոսկե մեդալի համար, քանի որ միշտ չէր ստացվում աշխարհի գավաթում ոսկի նվաճել: Իմ սխալների պատճառով չէր հաջողվում առաջինը լինել: Մարզիչների հետ միասին շատ կաշխատենք, որ աշխարհի գավաթի խաղարկությունում ունեցած սխալները չկրկնվեն Եվրոպայի առաջնությունում»,-«Արմենպրես»-ի մամուլի սրահում լրագրողների հետ հանդիպման ժամանակ ասաց մարմնամարզիկը:
Ավետիսյանի խոսքով` իր համար նպատակային է Եվրոպայի առաջնությունում մեդալակիր դառնալը:
Անդրադառնալով նախորդ մրցաշրջաններում իրեն խանգարող ուսի վնասվածքին, Ավետիսյանն առանձնացրեց, որ միջազգային ֆեդերացիայի կողմից փոխված նոր կանոնակարգով վարժությունների որոշ տարրեր հանվել են, որոնց թվում է նաև վնասվածքը խորացնող շարժումը: Հիմա չկա այդ տարրը և վարժությունն առավել հաջող է ստացվում:
«Մենք այս հաջողությունների համար պարտական ենք մեր մարզիչներին, քանի որ առանց նրանց, մենք ոչ մի բանի չենք հասնի»,-ընդգծեց նա:
Հայաստանի սպորտային մարմնամարզության հավաքականի անդամներն ավարտեցին ելույթներն աշխարհի գավաթում: Արթուր Դավթյանն ու Համլետ Մանուկյանը դարձան բացարձակ գավաթակիրներ, իսկ Արթուր Ավետիսյանը կարիերայում առաջին անգամ նվաճեց գավաթի խաղարկության 6-րդ փուլի ոսկե մեդալը:
Բաժանորդագրվեք մեր ալիքին Telegram-ում