Հայոց ցեղասպանութայն զոհերի հիշատակի և ոգեկոչման միջոցառումներ՝ Շիրակի մարզում

Օսմանյան կայսրության կողմից 1915թ. հայերի նկատմամբ իրականացված ցեղասպանությունը 20-րդ դարասկզբի մեծագույն ոճրագործությունն էր: Աշխարհասփյուռ հայությունն այսօր հիշատակում է Հայոց ցեղասպանության 110-րդ տարելիցը:  

Շիրակի մարզում Հայոց ցեղասպանության 110-րդ տարելիցին նվիրված հիշատակի միջոցառումներն այս տարի ևս մեկնարկեցին պատարագով, Շիրակի թեմի եկեղեցիներում մատուցվեց պատարագ։

«Արմենպրես»-ի փոխանցմամբ՝ Մեծ Եղեռնի 110-րդ տարելիցի օրը Գյումրիում ծաղիկներ խոնարհվեցին նաև Բագրատունյաց պուրակում՝ «Վերածնունդ» հուշակոթողի մոտ։ Հուշակոթողը խորհրդանշում է ոչ միայն հայ ժողովրդի անցյալը, այլև ներկան ու հավատը ապագայի հանդեպ։ «Վերածնունդ» հուշակոթողի մոտից միջոցառման մասնակիցները շարժվեցին Հերհերի ձոր, որն ավելի հայտնի է Ջարդի ձոր անվամբ։ Ըստ պատմական որոշ վկայությունների՝ 1918-21 թվականներին այս տարածքում են նահատակվել Ալեքպոլ գավառի և Ղարաքիլիսայի 50 գյուղի ավելի քան 12 հազար բնակիչ։ Պատմական մեկ այլ աղբյուրի համաձայն՝ հենց այս տարածքում 1920 թվականին Երիտթուրքերի ցեղասպան քաղաքականությունը շարունակել է քեմալական Թուրքիան։

«Ինչպես միշտ, այս տարի ևս եկել ենք Ջարդի ձոր՝ ոգեկոչելու մեր անմեղ զոհերին։ Ուզում եմ, որ այսօրվա խորհուրդը մեզ մտորելու տեղիք լինի՝ ոչ թե շարունակենք ողբալ, այլ շարունակենք ապրել։ Այս իրադարձությունը յուրաքանչյուր հայի ու սերունդների մեջ է։ Թեկուզ և մեկ միլիոն տարի անցնի՝ ոչ ոք չի կարող մոռացության տալ Ցեղասպանությունը»,-նշեց Շիրակի մարզպետ Դավիթ Առուշանյանը։