ՀՀ ԱՍՀ փոխնախարարն ու ԵՏՍԿ արտաքին հարաբերությունների ստորաբաժանման ղեկավարը կարևորել են օրակարգային հարցերի ուղղությամբ շարունակական համագործակցության անհրաժեշտությունը

Հայաստանի աշխատանքի և սոցիալական հարցերի նախարարի տեղակալ Ռուբեն Սարգսյանը հանդիպում է ունեցել Եվրոպական տնտեսական և սոցիալական կոմիտեի (ԵՏՍԿ) պատվիրակության հետ՝ ԵՏՍԿ արտաքին հարաբերությունների ստորաբաժանման ղեկավար Դիմիտրիս Դիմիտրիադիսի գլխավորությամբ։

Ինչպես «Արմենպրես»-ը տեղեկանում է ԱՍՀ նախարարության տարածած հաղորդագրությունից, կողմերը կարևորել են ՀՀ-ԵՄ հարաբերությունների զարգացման, ինչպես նաև օրակարգային հարցերի ուղղությամբ շարունակական համագործակցության անհրաժեշտությունը. մասնավորապես, քննարկվել են աշխատանքի և զբաղվածության ոլորտում իրականացվող բարեփոխումների, արհմիությունների դերի, ինչպես նաև գործազրկության մակարդակի նվազեցմանը վերաբերող մի շարք հարցեր։

Անդրադառնալով ոլորտային առաջնահերթություններին՝ Ռուբեն Սարգսյանը ներկայացրել է ՀՀ Զբաղվածության 2025-2031 թթ. ռազմավարական ծրագիրը, ՀՀ ժողովրդագրական իրավիճակի բարելավման 2024-2040 թթ․ ռազմավարությամբ սահմանված գերակայություններն ու այդ ուղղությամբ գործողությունների ծրագիրը։ Այս համատեքստում նախարարի տեղակալը մանրամասնել է նաև ՀՀ աշխատանքային օրենսգրքում կատարված լայնածավալ փոփոխությունները, խոսել սոցիալական գործընկերության դերի բարձրացման, ՀՀ-ԵՄ համապարփակ և ընդլայնված գործընկերության համաձայնագրի շրջանակում իրականացվող աշխատանքների մասին։