ԱՄՆ սենատորները ՌԴ-ի դեմ պատժամիջոցների մասին օրինագիծ են ներկայացրել

Ամերիկացի հանրապետական ​​սենատոր Լինդսի Գրեմը և նրա դեմոկրատ գործընկեր Ռիչարդ Բլումենթալը ներկայացրել են մի օրինագիծ, որը նախատեսում է առաջնային և երկրորդային պատժամիջոցներ սահմանել Ռուսաստանի դեմ, եթե Մոսկվան չհամաձայնի Ուկրաինայի հետ հրադադարին: «Արմենպրես»-ի փոխանցմամբ՝ այս մասին հաղորդել է The Hill-ը:

«Ռուսաստանի դեմ պատժամիջոցները ենթադրում են մաքսատուրքերի սահմանում այն երկրների համար, որոնք գնում են ռուսական նավթ, գազ, ուրան և այլ ապրանքներ», - ասվում է օրինագծի վերաբերյալ տարածված մամուլի հաղորդագրությունում։

Հստակեցվում է, որ պատժամիջոցները նախատեսում են 500 տոկոսի չափով մաքսատուրքերի սահմանում։

«Ռուսաստանի դեմ այդ պատժամիջոցներն արդեն պատրաստ են և կստանան երկկուսակցական ճնշող աջակցություն, եթե քվեարկության համար ներկայացվեն Սենատ և Ներկայացուցիչների պալատ», - հայտարարել են օրենսդիրները:

Օրինագիծը պաշտպանել է երկու կուսակցությունների 50 օրենսդիրներից բաղկացած խումբը: Նրանք նշել են, որ սատարում են ԱՄՆ նախագահ Դոնալդ Թրամփի ձգտումը՝ «հասնելու կայուն, արդար և արժանապատիվ խաղաղության»։