Մյանմայում երկրաշարժի զոհերի թիվը հասել է 2000-ի

Հարավարևելյան Ասիայում գտնվող Մյանմայում տեղի ունեցած ուժգին երկրաշարժից երեք օր անց զոհերի թիվը հասել է մոտ 2000-ի: «Արմենպրես»-ի փոխանցմամբ՝ այս մասին հաղորդում է Reuters-ը։

Փրկարարներին հաջողվել է փրկել Մյանմայի կենտրոնում փլուզված շենքերից մեկում գտնվող չորս մարդու, այդ թվում՝ հղի կնոջ և մեկ աղջկա։

Բացի այդ, Թաիլանդի մայրաքաղաք Բանգկոկում փրկարարները կառուցվող երկնաքերի փլատակներից դուրս են բերել ևս մեկ դի։ Արդյունքում շենքի փլուզման հետևանքով զոհերի թիվը հասել է 12-ի. ընդհանուր առմամբ, Թայլանդում զոհերի թիվը դարձել է 19։ Շինհրապարակում դեռ 75 մարդ անհետ կորած է:

Տարբեր երկրներից ժամանած փրկարարները շարունակում են որոնողափրկարարական աշխատանքները։

Միավորված ազգերի կազմակերպությունը հայտարարել է, որ շտապ օգնություն է տրամադրում Մյանմայի կենտրոնում գտնվող փրկվածներին:

55 միլիոն բնակչություն ունեցող երկրում վնասվել են կարևոր ենթակառուցվածքները, այդ թվում՝ կամուրջները, մայրուղիները, օդանավակայանները և երկաթուղիները, ինչը մեծապես խոչընդոտում է մարդասիրական ջանքերին։

Մյանմայի Միության Հանրապետությունը մեկշաբաթյա ազգային սուգ է հայտարարել երկրում տեղի ունեցած ավերիչ երկրաշարժի պատճառով։

Մարտի 28-ին Մյանմայում տեղի է ունեցել երկու հզոր երկրաշարժ՝ համապատասխանաբար 7,7 և 6,4 մագնիտուդով։ Ցնցումները զգացվել են նաև հարևան Թաիլանդում, ինչպես նաև Չինաստանում, Կամբոջայում, Բանգլադեշում և Հնդկաստանում։