Կանզասի ազգային գվարդիայի գլխավոր սերժանտ Քրիս Հարգիսը դասախոսությամբ է հանդես եկել ՀՀ ՊՆ Վազգեն Սարգսյանի անվան ռազմական ակադեմիայում
1 րոպեի ընթերցում
ՀՀ պաշտպանության նախարարության Վազգեն Սարգսյանի անվան ռազմական ակադեմիա մարտի 27-ին այցելել է Կանզասի ազգային գվարդիայի գլխավոր սերժանտ Քրիս Հարգիսը:
Ինչպես «Արմենպրես»-ին տեղեկացրին ՀՀ պաշտպանության նախարարությունից, այցի շրջանակում նա դասախոսությամբ է հանդես եկել բրիգադի սերժանտների դասընթացներում` անդրադառնալով սերժանտների դերին զինված ուժերի տարբեր օղակներում և ընդգծելով առաջնորդության մասնագիտական պատասխանատվության և սերժանտների ու հրամանատարների միջև արդյունավետ հաղորդակցման կարևորությունը։
Դասախոսության ընթացքում լուսաբանվել են առաջնորդության որակները և անձնական օրինակով առաջնորդելու անհրաժեշտությունը, հրամանատարների հետ հաղորդակցման և համագործակցության ձևերը, վստահության և կարգապահության կառուցումը ստորաբաժանումներում, սերժանտների առջև ծառացած մարտահրավերներն ու դրանց լուծումները։
Ըստ աղբյուրի՝ հանդիպման ավարտին հյուրերը շրջայց են կատարել ակադեմիայի տարածքում՝ հնարավորություն ունենալով ծանոթանալու ակադեմիայի ենթակառուցվածքներին, պատմությանը, ավանդույթներին և ձեռքբերումներին։