Մոսկվան ստիպված կլինի վերանայել Հայաստանի հետ տնտեսական հարաբերությունները, եթե Հայաստանը դեպի ԵՄ գնա. Օվերչուկ

Ռուսաստանի փոխվարչապետ Ալեքսեյ Օվերչուկը հայտարարել է, որ Մոսկվան ստիպված կլինի վերանայել Երևանի հետ տնտեսական հարաբերությունների ամբողջ համալիրը, եթե Հայաստանը որոշի գնալ Եվրամիություն։ 

«Արմենպրես»-ի փոխանցմամբ՝ այս մասին Օվերչուկն ասել է լրագրողների հետ զրույցում՝ անդրադառնալով Հայաստանի խորհրդարանի կողմից ԵՄ-ին անդամակցության գործընթաց սկսելու մասին նախագիծը երկրորդ ընթերցմամբ ընդունելու փաստին։ 

«Մենք մեր կողմից, իհարկե, ուշադրությամբ հետևում ենք այդ գործընթացներին։ Մենք հասկանում ենք՝ եթե Հայաստանը գնում է Եվրոպա, ապա, համապատասխանաբար, հարկավոր կլինի վերանայել այդ երկրի հետ տնտեսական հարաբերությունների ամբողջ համալիրը։ Եվ, ցավոք, դա կանդրադառնա Հայաստանի բնակիչների կենսամակարդակի վրա, ինչը, իհարկե, մենք չէինք ցանկանա»,- ասել է նա։ 

ՌԴ փոխվարչապետն ընդգծել է, որ ծանոթացել է Հայաստանի խորհրդարանի կողմից ընդունված օրենքին ԵՄ-ին անդամակցելու գործընթաց սկսելու մասին՝ հայտարարելով, որ դա Հայաստանի ներքին գործն է։ 

Միևնույն ժամանակ, ՌԴ փոխվարչապետն ասել է, որ Հայաստանը պետք է ընտրություն կատարի ԵԱՏՄ-ի և ԵՄ-ի միջև՝ շեշտելով, որ «միաժամանակ երկու աթոռի վրա նստել հնարավոր չէ»։ 

Նա հիշեցրել է, որ Հայաստանի և Ռուսաստանի միջև առևտրաշրջանառությունը 2024 թվականի հասել է 12.7 միլիարդ դոլարի՝ ավելանալով ավելի քան 50 տոկոսով։ «Եթե նայեք նրանց առևտրաշրջանառությանը Եվրամիության հետ, ապա այնտեղ 2 միլիարդից մի փոքր ավելի է, իսկ առևտրաշրջանառությունը նվազել է 12 տոկոսով։ Սա խոսում է այն մասին, թե որքանով է շահավետ առևտուրը Եվրասիական տնտեսական միության հետ և որքանով է շահավետ առևտուրը Եվրոպայի հետ։ Հայերը, իհարկե, պետք է ընտրություն կատարեն»,- ասել է ՌԴ փոխվարչապետը։ 

Նա հավելել է, որ Հայաստանն այսօր աշխատում է ակտիվ աշխատանքները Եվրասիական տնտեսական միությունում։ «Այսօր Հայաստանը իր դրական ներդրումն է ունենում հենց եվրասիական ինտեգրացիայի մեջ»,- եզրափակել է Օվերչուկը։