2 րոպեի ընթերցում
Հայաստանի Հանրապետության մարզերի և Երևան քաղաքի հանրակրթական դպրոցների 7-12-րդ դասարանների աշակերտների «Սպարտակիադա» մարզական միջոցառման շրջանակում Գեղարքունիքի մարզի դպրոցականների միջև անցկացվել են «Դիպուկ հրաձիգ» հրաձգության մարզային մրցումներ՝ համայնքային և մարզային փուլերով:
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի ԿՄՍ վարչությունից, համայնքային փուլի մրցումներն անցկացվել են փետրվարի 27-28-ին, որի արդյունքում յուրաքանչյուր համայնքից երկու լավագույն դպրոցական թիմ մասնակցել է մարտի 14-ին Գավառի Հ. Թումանյանի անվան N 3 հիմնական դպրոցի հրաձգարանում կազմակերպված մարզային փուլի մրցումներին: Թիմի կազմում ընդգրկվել է 4 տղա և 4 աղջիկ: Մրցումներն անցկացվել են օդամղիչ հրացաններով` մինչև թիրախ 10 մետր հեռավորությունից: Հրաձգության միջազգային ֆեդերացիայի կանոնակարգի համաձայն՝ յուրաքանչյուր հրաձիգ կատարել է 8 կրակոց, որից հաշվարկային է եղել 5 լավագույնը: Ծավալվել է հետաքրքիր և համառ պայքար, որի արդյունքում թիմային հաշվարկով 385 միավորով առաջին հորիզոնականը զբաղեցրել է Մարտունի համայնքի Զոլաքար գյուղի N 1 միջնակարգ դպրոցի թիմը։ Երկրորդ տեղը 345 միավորով գրավել է Մարտունու Մ. Մելիք-Շահումյանցի անվան N 1 հիմնական դպրոցի թիմը, իսկ երրորդ տեղում 334 միավորով Գավառի Գեորգի Մնացականյանի անվան N7 միջնակարգ դպրոցի թիմն էր:
2025 թվականի ապրիլի 8-ին Երևանում կայանալիք հրաձգության մրցումների հանրապետական փուլում ՀՀ Գեղարքունիքի մարզը կներկայացնի Զոլաքար գյուղի N 1 միջնակարգ դպրոցի թիմը: