Ծովազարդի դպրոցի աշակերտները մարզային գրադարանում ներկայացրել են գրքի և համակարգչի տարբերությունները, ընդգծել դրանց առավելությունները
1 րոպեի ընթերցում
Գեղարքունիքի մարզի Գավառ համայնքի Ծովազարդի միջնակարգ դպրոցի մի խումբ աշակերտներ դպրոցի տնօրենի տեղակալի, ուսուցիչների, գրադարանավարի և ծնողների ուղեկցությամբ այցելել են մարզային գրադարան։
Ինչպես «Արմենպրես»-ին տեղեկացրեց Վարդգես Պետրոսյանի անվան մարզային գրադարանի տնօրեն Մարիամ Համբարձումյանը, այցի շրջանակում դպրոցի հայոց լեզվի և գրականության ուսուցչուհի Սիրանուշ Գալստյանի նախաձեռնությամբ իրականացվել է ուսուցողական միջոցառում՝ «Գիրքը տիեզերք է անեզր» խորագրով։
Միջոցառման ընթացքում աշակերտները ներկայացրել են գրքի և համակարգչի տարբերությունները, ընդգծել դրանց առավելություններն ու կարևորությունը, ինչպես նաև խոսել մայրենի լեզվի անաղարտության պահպանման մասին։ Գրադարանի աշխատակիցները ողջունել են նախաձեռնությունը։
Երեխաները շրջայց են իրականացրել գրադարանում, ծանոթացել ֆոնդերին և գրադարանից օգտվելու կանոններին։ Միջոցառման ավարտին մարզային գրադարանի կողմից Ծովազարդի դպրոցի գրադարանին նվիրել են ՀՀ ԿԳՄՍ նախարարության ծրագրերով հրատարակված գրքեր՝ հարստացնելով դպրոցի գրադարանի գրքային ֆոնդը։