Եվրոպական և արաբական տարբեր երկրներ ու կառույցներ ողջունել են Սիրիայի ղեկավարության համաձայնագիրը քրդերի հետ
4 րոպեի ընթերցում
Եվրամիության արտաքին քաղաքականության ղեկավար Կայա Կալասը ողջունել է քրդական «Սիրիայի դեմոկրատական ուժերի» (SDF) և սիրիական կառավարության համաձայնագիրը՝ ընդգծելով, որ այն ճանապարհ կհարթի սիրիացիների համար ավելի մեծ կայունության և ավելի լավ ապագայի համար: «Արմենպրես»-ի փոխանցմամբ՝ այս մասին հայտնում է Եվրամիության մամուլի ծառայությունը։
«Ողջունում ենք առանցքային զարգացումները ներառական անցման ճիշտ ուղղությամբ՝ նախօրեին «Սիրիայի դեմոկրատական ուժերի» և Դամասկոսի միջև հայտարարված համաձայնագրով, որը կարող է ճանապարհ հարթել դեպի ավելի մեծ կայունություն և ավելի լավ ապագա բազմաթիվ սիրիացիների համար: Մեր կողմից և Սիրիայում տիրող սոցիալ-տնտեսական ծանր իրավիճակը մեղմելու նպատակով ԵՄ-ն դադարեցրել է որոշակի սահմանափակող միջոցներ», - նշել է նա։
Կալասը կոչ է արել բոլոր արտաքին կողմերին հարգել Սիրիայի միասնությունն ու ինքնիշխանությունը։
ՄԱԿ-ի գլխավոր քարտուղարի խոսնակ Ստեֆան Դյուժարիկը ևս ողջունել է Սիրիայի կառավարության և «Սիրիայի դեմոկրատական ուժերի» միջև ձեռք բերված համաձայնությունը։ Ամենօրյա ասուլիսի ժամանակ Դյուժարիկը նշել է, որ Սիրիայի հարցով ՄԱԿ-ի հատուկ բանագնաց Գեյր Պեդերսենը հուսով է, որ այս համաձայնագիրը կնպաստի քաղաքական անցումային գործընթացին աջակցելուն և ամրապնդելուն։
Իր հերթին Սիրիայի հարցով ՄԱԿ-ի հատուկ բանագնաց Գեյր Պեդերսենը X-ի իր էջում կոչ է արել հիմնական միջազգային դերակատարներին, այդ թվում՝ ԱՄՆ-ին, Թուրքիային և տարածաշրջանային գործընկերներին, աջակցել սիրիացիներին՝ իրականացնելու համազգային զինադադար և իրական քայլերով ամրապնդել խաղաղությունն ու կայունությունը Սիրիայի հյուսիս-արևելքում:
Վերջին մի քանի ժամվա ընթացքում համաձայնագիրը ողջունող հայտարարություններ են հնչել նաև Սաուդյան Արաբիայից, Կատարից, Քուվեյթից, Հորդանանից, Պարսից ծոցի համագործակցության խորհուրդից, Թուրքիայից, Գերմանիայից, ԱՄՆ-ից:
ԱՄՆ-ի կողմից աջակցություն ստացող քրդական ինքնավար վարչակազմը վերահսկում է հսկայական տարածքներ հյուսիսային և արևելյան Սիրիայում, ներառյալ նավթի և գազի խոշոր հանքավայրերը:
«Սիրիայի դեմոկրատական ուժերը» հյուսիսային և արևելյան Սիրիայի ինքնավար վարչակազմի ռազմական թևն են, որոնք ղեկավարում էին «Իսլամական պետության» դեմ պայքարը, մինչև 2019 թվականին հաջողվեց դուրս քշել այդ ահաբեկչական խմբավորմանն իր վերջին հենակետերից։
Սիրիայի նախագահ Ահմեդ աշ-Շարաայի և քրդական «Սիրիայի դեմոկրատական ուժերի» ղեկավար Մազլում Աբդիի միջև ստորագրված համաձայնագիրը ներառում է ութ հիմնական դրույթ, այդ թվում՝ բոլոր սիրիացիների իրավունքների երաշխավորում, քրդական համայնքի ճանաչում որպես սիրիական պետության անբաժանելի մաս և սահմանադրական և քաղաքացիական իրավունքների երաշխավորում: