Եվրոպական խորհուրդը ներկայացրել է իր մոտեցումը Ուկրաինայի շուրջ բանակցությունների հարցում

Եվրոպական խորհուրդը նշել է այն սկզբունքները, որոնց վրա պետք է հիմնվեն ռուս-ուկրաինական համակարտության կարգավորման շուրջ բանակցությունները՝ հաշվի առնելով նման բանակցությունների համար առաջացած խթանը։ «Արմենպրես»-ի փոխանցմամբ՝ այս մասին հայտարարություն է տարածվել մարտի 6-ին Բրյուսելում Եվրոպական խորհրդի արտահերթ գագաթնաժողովից հետո։

Ինչպես ասվում է գագաթնաժողովի եզրափակիչ փաստաթղթում, «չի կարող լինել Ուկրաինայի շուրջ ոչ մի բանակցություն առանց Ուկրաինայի», ինչպես նաև չեն կարող լինել «բանակցություններ, որոնք կվերաբերեն եվրոպական անվտանգությանը՝ առանց Եվրոպայի մասնակցության»։

«Ուկրաինայի, Եվրոպայի անվտանգությունը, անդրատլանտյան և գլոբալ անվտանգությունը փոխկապված են», - ասվում է Եվրախորհրդի փաստաթղթում, որը ստորագրել են ԵՄ-ի անդամ 27 անդամ պետություններից 26-ը։

ԵՄ երկրների ղեկավարները հայտարարել են, որ «ցանկացած զինադադար կամ հրադադար կարող է տեղ ունենալ միայն որպես համապարփակ հաշտության համաձայնագրի տանող գործընթացի մաս», և «ցանկացած նման համաձայնագիր պետք է ուղեկցվի Ուկրաինայի համար հուսալի և վստահության արժանի անվտանգության երաշխիքներով»:

Եվրոպայի ղեկավարներն ընդգծել են, որ «աշխարհը պետք է հարգի Ուկրաինայի անկախությունը, ինքնիշխանությունն ու տարածքային ամբողջականությունը»։

Ինչպես Բրյուսելում լրագրողներին հայտնել է ԵՄ կառույցների մի աղբյուր, փաստաթուղթը չի ստորագրել Հունգարիայի վարչապետ Վիկտոր Օրբանը։