368.52
ԵՄ-ն ազատ առևտրի համաձայնագիր է առաջարկել Հնդկաստանին
2 րոպեի ընթերցում
Եվրահանձնաժողովի ղեկավար Ուրսուլա ֆոն դեր Լայենը, որը գտնվում է Հնդկաստանում երկկողմ շփումներն ամրապնդելու համար, Նյու Դելիին առաջարկել է ազատ առևտրի և անվտանգության ու պաշտպանության բնագավառում ռազմավարական գործընկերության շուրջ համաձայնագրեր կնքել։ «Արմենպրես»-ի փոխանցմամբ՝ ֆոն դեր Լայենի այցի մասին հաղորդագրություններ է տարածել Եվրահանձնաժողովի մամուլի ծառայությունը:
«ԵՄ-ի և Հնդկաստանի միջև ազատ առևտրի համաձայնագիրը կարող է լինել իր տեսակի մեջ խոշորագույն գործարքն աշխարհում: Ես հիանալի հասկանում եմ, որ դա հեշտ չի լինելու: Բայց ես նաև գիտեմ, որ կարևոր են ճիշտ ժամանակը և վճռականությունը, և որ այս գործընկերությունը տեղի է ունենում մեզ երկուսիս համար ճիշտ պահին: Ահա թե ինչու ենք մենք վարչապետ Մոդիի հետ պայմանավորվել աշխատել դրա վրա այս տարվա ընթացքում», - ասել է ֆոն դեր Լայենը:
Նա հավելել է, որ Բրյուսելը կցանկանար Հնդկաստանի հետ կնքել նաև անվտանգության և պաշտպանության ոլորտում ռազմավարական գործընկերության համաձայնագիր։
«Ես կարող եմ հայտարարել, որ մենք ուսումնասիրում ենք անվտանգության և պաշտպանության բնագավառում Հնդկաստանի հետ գործընկերության ապագան՝ Ճապոնիայի և Հարավային Կորեայի հետ մեր գործընկերության օրինակով: Դա մեզ կօգնի ակտիվացնել մեր աշխատանքը՝ դիմակայելու ընդհանուր սպառնալիքներին՝ լինի դա անդրսահմանային ահաբեկչություն, անվտանգության սպառնալիքներ ծովում, կիբեռգրոհներ կամ նոր երևույթ, որ մենք տեսնում ենք՝ գրոհներ մեր կարևոր ենթակառուցվածքների վրա», - հայտարարել է Եվրահանձնաժողովի ղեկավարը:
Ուրսուլա ֆոն դեր Լայենը շնորհակալություն է հայտնել Հնդկաստանին ջերմ հյուրընկալության համար և նշել, որ եվրահանձնակատարների ամբողջ կոլեգիայի այցը Հնդկաստան առաջին օտարերկրյա այցն է 2024 թ. դեկտեմբերին նոր կազմի կողմից պաշտոնը ստանձնելուց ի վեր։
Բաժանորդագրվեք մեր ալիքին Telegram-ում