Շարունակում ենք կարևոր խոսակցությունները ԱՄՆ-ի հետ համագործակցությունն արդյունավետ դարձնելու համար. Արարատ Միրզոյան
2 րոպեի ընթերցում
Հայաստանի արտաքին գործերի նախարար Արարատ Միրզոյանը հայտարարել է, որ Երևանը, հիմնվելով Վաշինգտոնի հետ ունեցած ռազմավարական գործընկերության վրա, հավատարիմ է տարբեր ոլորտներում երկկողմ կապերի խորացմանը և նոր հնարավորությունների հասնելուն։
«Արմենպրես»-ի հաղորդմամբ՝ այս մասին նշված է ԱԳ նախարար Միրզոյանի X-ի միկրոբլոգում կատարված գրառման մեջ։
«Ուրախ եմ Հայաստանի վարչապետ Նիկոլ Փաշինյանին Վաշինգտոն կատարած այցի ընթացքում ուղեկցելու համար»,-ասված է գրառման մեջ։
Միրզոյանը շեշտել է, որ Հայաստանը շարունակում է ջանքեր գործադրել՝ զարգացնելու հայ-ամերիկյան հարաբերությունները տարբեր ոլորտներում։
«Հիմնվելով Հայաստան-Միացյալ Նահանգներ ռազմավարական գործընկերության վրա՝ մենք շարունակում ենք մեր ջանքերն ու կարևոր խոսակցությունները Հայաստանի և Միացյալ Նահանգների միջև տնտեսության, առևտրի, անվտանգության և այլ ոլորտներում համագործակցությունն արդյունավետ դարձնելու համար»,-նշել է Արարատ Միրզոյանը։
Նա նաև հավելել է, որ Հայաստանը հավատարիմ է Վաշինգտոնի հետ կապերի խորացմանը։
«Ունենալով ամուր հիմք և պայծառ հեռանկարներ՝ մենք հավատարիմ ենք կապերի խորացմանը և մեր ժողովուրդների համար նոր հնարավորություններ փնտրելուն»,-ընդգծել է Հայաստանի ԱԳ նախարարը:
Վարչապետ Նիկոլ Փաշինյանն աշխատանքային այցով ԱՄՆ-ում է, որտեղ մասնակցել է Միջազգային կրոնական ազատության գագաթնաժողովին։ Վարչապետ Նիկոլ Փաշինյանի գլխավորած պատվիրակության կազմում է նաև ՀՀ արտաքին գործերի նախարար Արարատ Միրզոյանը։