Փաշինյանն ու Կոբախիձեն պայմանավորվել են Հայաստանի և Վրաստանի միջև սահմանազատման գործընթացն ակտիվացնելու ջանքեր գործադրել
1 րոպեի ընթերցում
Հայաստանի վարչապետ Նիկոլ Փաշինյանն ու Վրաստանի վարչապետ Իրակլի Կոբախիձեն խոսել են երկու երկրների միջև սահմանազատման գործընթացը ակտիվացնելու մասին:
«Արմենպրես»-ի փոխանցմամբ՝ Փաշինյանն այս մասին ասաց Կոբախիձեի հետ հանդիպումից հետո համատեղ մամուլի հայտարարության ժամանակ:
«Վրաստանի վարչապետի հետ այսօր տեղի ունեցած քննարկումների ընթացքում խոսել ենք նաև Հայաստանի և Վրաստանի միջև սահմանազատման գործընթացը ակտիվացնելու մասին և պայմանավորվել ենք, որ այդ ուղղությամբ ջանքեր կգործադրենք»,–ասաց Փաշինյանը:
Նա շեշտեց, որ Հայաստանն ու Վրաստանը ձևավորել են հետագա համագործակցությունն ընդլայնելու, զարգացնելու համար անհրաժեշտ գործիքակազմ: Կողմերն առաջիկայում ևս ջանքեր չեն խնայելու երկկողմ և տարածաշրջանային բարօրությանը միտված փոխգործակցությունն ընդլայնելու և ամրապնդելու ուղղությամբ: