ԼՂ-ից բռնի տեղահանված բազմաշունչ ընտանիքը բնակարանամուտ է նշել ԱՄՆ «Փարոս» հիմնադրամի միջոցներով
1 րոպեի ընթերցում
Լեռնային Ղարաբաղի Մարտակերտի շրջանից 2023 թվականին բռնի տեղահանված և Գեղարքունիքի մարզի Վարդենիս համայնքի Մեծ Մասրիկ գյուղում վարձով ապրող Մարտին Գրիգորյանի ընտանիքը բնակարանամուտ է նշել Վարդենիս քաղաքի բազմաբնակարան շենքերից մեկում, ԱՄՆ «Փարոս» հիմնադրամի միջոցներով։
Ինչպես «Արմենպրես»-ին տեղեկացրին Վարդենիսի համայնքապետարանի աշխատակազմից, բնակարանի բանալիներն անձամբ հանձնել է «Փարոս» հիմնադրամի տնօրեն Փիթեր Աբաջյանը։
Մարտին Գրիգորյանը ԼՂ-ից Վարդենիս է բռնագաղթել իր կնոջ ու երեք երեխաների հետ միասին, իսկ չորրորդ երեխան ծնվել է Հայաստանում, 2024 թվականի նոյեմբերին։
«Փարոս» հիմնադրամը բազմաբնակարան շենքում գնել, հիմնանորոգել ու բոլոր հարմարություններով կահավորել է 3 սենյականոց բնակարան ու այն հանձնել շահառու ընտանիքին։ Չորս երեխաներից երկուսը դպրոցական են։
Մարտին Գրիգորյանն աշխատանք է գտել Վարդենիսի էլցանցում, իսկ նրա կինը զբաղված է երեխաների խնամքով։