Ֆրանսիայի ԱԳՆ-ն հայտնել է Սիրիայի դեմ պատժամիջոցների մի մասը դադարեցնելու՝ ԵՄ խորհրդի պլանների մասին
1 րոպեի ընթերցում
ԵՄ արտաքին գործերի խորհուրդը հունվարի 27-ին որոշում կընդունի հակասիրիական մի շարք պատժամիջոցների դադարեցման մասին: «Արմենպրես»-ի փոխանցմամբ՝ այդ մասին հայտարարել է Ֆրանսիայի արտգործնախարար Ժան Նոել Բարոն Բրյուսելում Եվրամիության խորհրդի նիստից առաջ։
«Այսօր մենք որոշում կկայացնենք դադարեցնել առանձին պատժամիջոցներ, որոնք կիրառվել են էներգետիկայի, տրանսպորտի և ֆինանսական հաստատությունների հատվածներում, և որոնք խանգարում են երկրի տնտեսական կայունացմանը և վերականգնման գործընթացի մեկնարկին», - Բարոյի խոսքերն է մեջբերում «Ինտերֆաքս» գործակալությունը։
Նա պարզաբանել է, որ պատժամիջոցների այս դադարեցումը կիրականացվի բոլոր սիրիացիներին քաղաքական անցման գործընթացում ընդգրկելու ակնկալիքով, որը կապահովի «անվտանգությունը երաշխավորող վճռական միջոցներ, հատկապես անսասան պայքար «Իսլամական պետություն» ահաբեկչական խմբավորման վերածնման ցանկացած ձևի դեմ»: Նա նաև կարևորել է Բաշար Ասադի ռեժիմի քիմիական զենքի պաշարների հայտնաբերումն ու ոչնչացումը: