1 րոպեի ընթերցում
ԱՄՆ հարավային նահանգներում անոմալ ցուրտ եղանակի պատճառով զոհերի թիվը հասել է 10-ի: «Արմենպրես»-ի փոխանցմամբ՝ այս մասին հաղորդում է The New York Times-ը:
Ավելի վաղ ամերիկյան ԶԼՄ-ները գրել էին 4 զոհի մասին։
Մահվան ելքով դեպքեր են գրանցվել, մասնավորապես, Տեխասում, Ալաբամայում, Ջորջիայում:
ԱՄՆ-ի օդերևութաբանական ծառայությունները հորդորում են վարորդներին, որոնք գտնվում են անոմալ ցուրտ շրջաններում, չօգտագործել անձնական փոխադրամիջոցները և մնալ տանը, քանի որ վերջին օրերին մերկասառույցի պատճառով հարյուրավոր խոշոր ճանապարհատրանսպորտային պատահարներ են տեղի ունեցել:
Տեխասի նահանգի Հյուսթոնի երկու օդանավակայաններում չեղարկվել են բոլոր չվերթերը։ Ընդհանուր առմամբ, վերջին երեք օրվա ընթացքում ամբողջ երկրում չեղարկվել է ավելի քան 2000 չվերթ, ևս շուրջ 13 000-ը՝ հետաձգվել։
Հարավային նահանգների մեծ մասում, ներառյալ Լուիզիանայում, Միսիսիպիում և Ալաբամայում, առաջին անգամ արտակարգ դրություն են հայտարարել ձնաբքի պատճառով։ Բազմաթիվ դպրոցներ դադարեցրել են աշխատանքը:
Արկտիկական ցիկլոնը ԱՄՆ-ի տարածք է եկել հանգստյան օրերին։ Կանխատեսվում է, որ ծայրահեղ եղանակային պայմանները կպահպանվեն ևս մի քանի օր։