2 րոպեի ընթերցում
ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ տարբեր բնակավայրերում գործող 8 պոլիկլինիկաների շենքերը վերակառուցման փոխարեն կփոխարինվեն նոր, տիպային նորակառույցներով:
«Արմենպրես»-ի հաղորդմամբ՝ այս մասին լրագրողների հետ հանդիպմանը տեղեկացրեց ՀՀ առողջապահության նախարար Անահիտ Ավանեսյանը:
Նրա պարզաբանմամբ՝ այդ հին շենքերը բարոյապես մաշված են և դրանց նոր շունչ, կոնցեպտ հաղորդելու արդյունքները գոհացուցիչ չեն:
«Մենք գնացինք նոր տիպային պոլիկլինիկաների նախագծմանը, և ամբուլատորիաների նոր կոնցեպտով նախագծային աշխատանքներն ու փորձաքննությունն արդեն ավարտվել է, ու հանձնել ենք Տարածքային զարգացման հիմնադրամին, որպեսզի շինարարական գործընթացները մեկնարկեն»,- մանրամասնեց Ավանեսյանը:
Գերատեսչության ղեկավարի խոսքով՝ այդ առումով տեղային մի քանի որոշումներ են կայացվել․ մասնավորապես, Աշտարակի բժշկական կենտրոնում մեկնարկած վերակառուցման աշխատանքների ընթացքում պարզվել է, որ շենքի հիմքերն այնպիսի վիճակում են, որ հավելյալ ամրացումների համար պահանջվող միջոցներն ու կառույցի շահագործման հնարավոր ժամանակահատվածը չեն արդարացնում բյուջետային միջոցների ծախսերը: Այդ պատճառով որոշում է ընդունվել շինարարությունը դադարեցնել, և ներկայում սկսվել է նոր շենքի նախագծի մշակումը:
Ըստ այդմ՝ հին շենքը կքանդվի և նորը կկառուցվի: Նույն տրամաբանությամբ փոփոխվել են նաև Էջմիածնի ու Սիսիանի ԲԿ-ների նախագծերը: