Պետության ղեկավարի դերն ու գործառույթն է ի վիճակի լինել կայացնել որոշումներ՝ առանց դրա պատասխանատվությունը որևէ մեկի հետ կիսելու. Նիկոլ Փաշինյան
2 րոպեի ընթերցում
ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի Հանրապետության վարչապետ Նիկոլ Փաշինյանի դիտարկմամբ՝ կառավարության և պետության ղեկավարի դերն ու գործառույթն է ի վիճակի լինել կայացնել որոշումներ՝ առանց դրա պատասխանատվությունը որևէ մեկի հետ կիսելու և առանց դրա շուրջ որևէ մեկի հետ խորհրդակցելու:
«Արմենպրես»-ի հաղորդմամբ՝ այս մասին հանրային հեռուստաընկերությանը տված հարցազրույցում նշեց վարչապետ Նիկոլ Փաշինյանն՝ անդրադառնալով հարցին, թե արդյոք վերջին պաշտոնանկությունների վերաբերյալ որոշումները կայացվել են միանձնյա կերպով:
«Սա միանձնյա որոշում էր, որովհետև վարչապետն ունի իր լիազորությունների շրջանականը», - ասաց վարչապետ Նիկոլ Փաշինյանը:
Նրա խոսքով՝ ինքը թիմակիցների հետ շատ հարցերի շուրջ է քննարկումներ ունենում, և որոշ դեպքերում դրանք լինում են շատ ընդլայնված քննարկումներ, ինչը նորմալ է:
«Կառավարության և պետության ղեկավարի դերն ու գործառույթն այն է, որ կան պահեր, որ ինքը պետք է ի վիճակի լինի կայացնել որոշումներ՝ առանց դրա պատասխանատվությունը որևէ մեկի հետ կիսելու և առանց՝ դրա շուրջ որևէ մեկի հետ խորհրդակցելու, դա է իմաստը»,- շեշտեց վարչապետ Փաշինյանը:
Վարչապետ Նիկոլ Փաշինյանը նոյեմբերի 14-ի կառավարության նիստում իր դժգոհությունն էր հայտնել իրավապահ մարմինների և դատական համակարգի աշխատանքի վերաբերյալ՝ շեշտելով, որ իր համբերության բաժակը լցվել է և որոշումներ է կայացնելու։ Նոյեմբերի 18-ին վարչապետը հայտնել էր, որ մի խումբ բարձրաստիճան պաշտոնյաների խնդրել է թողնել իրենց պաշտոնները։ Նրանց թվում էին Գնել Սանոսյանը` Տարածքային կառավարման և ենթակառուցվածքների նախարարի պաշտոնից, Վահե Ղազարյանը` Ներքին գործերի նախարարի, Ռուստամ Բադասյանը` ՊԵԿ նախագահի, Արգիշտի Քյարամյանը` Քննչական կոմիտեի նախագահի, Սասուն Խաչատրյանը` Հակակոռուպցիոն կոմիտեի նախագահի, Կարեն Անդրեասյանը` Բարձրագույն դատական խորհրդի նախագահի պաշտոններից: Որոշ պաշտոններում նոր նշանակումներ արդեն արվել են: