Պատին ամրացված բանանը Նյու Յորքում վաճառվել է 6,2 միլիոն դոլարով. գնորդը պատրաստվում է ուտել այն

ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ։ Իտալացի նկարիչ Մաուրիցիո Կատելանի «Կատակերգու» խորագրով գործը, որն իրենից ներկայացնում է կպչուն ժապավենով պատին փակցված թարմ բանան, ևս մեկ անգամ գերել է շատերին՝ Նյու Յորքի Sotheby’s աճուրդի տանը վաճառվելով 6,2 միլիոն դոլարով։ «Արմենպրես»-ի փոխանցմամբ՝ այս մասին հայտնել է Sotheby’s-ը X սոցիալական հարթակում։

#AuctionUpdate: Maurizio Cattelan’s iconoclastic 'Comedian' has captivated the world once again—this time in the #SothebysNewYork salesroom. The world’s most notorious banana just sold for $6.2M. #SothebysNOW pic.twitter.com/6bOSz0k5b0

— Sotheby's (@Sothebys) November 21, 2024

Պատին փակցված բանանը գնել է ծագումով չինացի կրիպտո միլիոնատեր Ջասթին Սունը։

France24-ը հիշեցնում է, որ «Կատակերգու»-ի դեբյուտը կայացել է Մայամի Բիչում 2019 թվականին․ այն լուրջ հակասություններ էր առաջացրել և հարցեր բարձրացրել՝ արդյոք դա պետք է համարվի արվեստի գործ։ 5 տարի առաջ արծաթագույն կպչուն ժապավենով պատին փակցված բանանը վաճառվել էր 120 000 դոլարով։

«Սա պարզապես արվեստի գործ չէ, այն ներկայացնում է մշակութային երևույթ, որը կամրջում է արվեստի աշխարհները, մեմերը և կրիպտոարժույթների հանրությունը։ Կարծում եմ, որ այս ստեղծագործությունն ապագայում ավելի շատ մտքեր ու քննարկումներ կներշնչի և կդառնա պատմության մի մասը», - ասել է Սունը:

Կատելանի աշխատանքը կարող էր հասնել 7 հավանական գնորդի։ Աճուրդի տունը գերազանցել է բոլոր սպասելիքները, քանի որ ակնկալվում էր, որ «Կատակերգու»-ն կվաճառվի 1-1,5 միլիոն դոլարով։

Ջասթին Սունին տրվելու է գնման վկայագիր, որ աշխատանքը ստեղծվել է Մաուրիցիո Կատելանի կողմից։ Բացի այդ, նա կստանա ցուցումներ՝ ինչպես փոխարինել միրգը, երբ այն փչանա։

Սունը հայտնել է, որ մտադիր է ուտել բանանը։

«Առաջիկա օրերին ես անձամբ կուտեմ բանանը՝ որպես եզակի գեղարվեստական փորձառության մաս՝ հարգելով դրա տեղը թե՛ արվեստի պատմության, թե՛ ժողովրդական մշակույթի մեջ», - ասել է նա։ 

Ըստ The New York Times-ի՝ նոյեմբերի 20-ին 6,2 միլիոն դոլարով վաճառված բանանը գնվել է 35 ցենտով բանգլադեշցի մրգավաճառից։