Ճարտարապետության և շինարարության Հայաստանի ազգային համալսարանում մեկնարկել է «Դիզայնն առանց սահմանների» միջազգային շաբաթը
4 րոպեի ընթերցում
ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Երևանում մեկնարկել է «Դիզայնն առանց սահմանների» միջազգային շաբաթը: Ճարտարապետության և շինարարության Հայաստանի ազգային համալսարանում անցկացվող միջազգային շաբաթը կտևի մինչև հոկտեմբերի 26-ը:
«Արմենպրես»-ի փոխանցմամբ՝ Ճարտարապետության և շինարարության Հայաստանի ազգային համալսարանի կողմից իրականացվող միջոցառումը մեկ հարկի տակ հյուրընկալել է Սանկտ Պետերբուրգի արդյունաբերական տեխնոլոգիաների և դիզայնի պետական համալսարանի և Սանկտ Պետերբուրգի պետական ճարտարապետության և շինարարության համալսարանի դասախոսներին և ուսանողներին՝ ստեղծելով բացառիկ հարթակ գործընկերային կապերի ամրապնդման, համատեղ կրթական և ստեղծագործական նախագծերի զարգացման համար:
Միջոցառումը կնպաստի կրթական և մշակութային կապերի խորացմանը՝ դարձնելով «Դիզայնն առանց սահմանների» միջազգային շաբաթը կարևոր իրադարձություն թե՛ կրթական, թե՛ մասնագիտական համայնքի համար։
ՃՇՀԱՀ-ի դիզայնի ֆակուլտետի դեկան Արտաշես Մելիքյանը նշեց, որ դիզայնը, ինչպես նաև գիտությանն ու արվեստին հարող այլ մասնագիտություններ, միշտ ունեն զարգանալու տեղ:
«Նման մասնագիտությունները չեն ճանաչում ո՛չ ազգություն, ո՛չ սահմաններ, ո՛չ կրոն և միտված են միավորելու մարդկանց: ՃՇՀԱՀ-ում առաջին անգամ է անցկացվում միջազգային նման միջոցառում, որը կազմակերպել է հենց մեր ֆակուլտետը։ Վստահ եմ, որ այն մեծապես կնպաստի մեր կրթական ծրագրերի զարգացմանը»,- ասաց Մելիքյանը:
Նա ընդգծեց՝ միջազգային շաբաթվա ընթացքում քննարկվելու են ուսանողների փոխանակման ծրագրերը գործընկեր բուհերի միջև, երրորդ աստիճանի բարձրագույն կրթության ներդրումը, կապը ՃՇՀԱՀ-ի և Սանկտ Պետերբուրգի ոլորտային բուհերի միջև և մի շարք այլ կարևոր հարցեր:
Սանկտ Պետերբուրգի արդյունաբերական տեխնոլոգիաների և դիզայնի պետական համալսարանի միջազգային ծրագրերի զարգացման բաժնի ղեկավար Քրիստինա Շիրիկովան նշեց՝ սա համագործակցելու հիանալի հնարավորություն է, որտեղ, բացի փորձի փոխանակումից, հնարավոր է ձևավորել գործընկերային հարաբերություններ, որը հնարավորություն կտա ապագայում իրագործել համատեղ մի շարք ծրագրեր:
Սանկտ Պետերբուրգի պետական ճարտարապետության և շինարարության համալսարանի կրթական գծով դեկանի տեղակալ, Ճարտարապետական դիզայնի ամբիոնի դոցենտ Ելենա Վոյցեխովսկայան էլ կարևորեց, որ այս մեկ շաբաթվա ընթացքում կհամագործակցեն դասախոսները, ինչպես նաև ուսանողները հնարավորություն կունենան ուսումնասիրելու և սովորելու Ճարտարապետության և շինարարության Հայաստանի ազգային համալսարանի ուսման մեթոդների առանձնահատկությունները:
«Ես հույս ունեմ, որ նման միջոցառումները մեր համալսարանների միջև կլինի շարունակական: «Դիզայնն առանց սահմանների» միջազգային շաբաթը լավագույն հարթակն է՝ ձևավորելու նոր համագործակցություն և այն դարձնել շարունակական»,- ընդգծեց Ելենա Վոյցեխովսկայան:
Արտերկրից ժամանած ուսանողները ևս հնարավորություն կունենան մասնակցելու ՃՇՀԱՀ-ի դիզայնի ֆակուլտետի դասախոսական անձնակազմի կողմից պատրաստած դասախոսություններին և վարպետության դասերին։ Հյուրերը կհանդիպեն դիզայնի ֆակուլտետի ներկայացուցիչների հետ՝ քննարկելու հետագա համատեղ ծրագրերը։
Միջոցառման ընթացքում ուսանողները և մասնակիցները կայցելեն համալսարանի ստուդիաներ ու լաբորատորիաներ՝ մասնակցելով ստեղծագործական աշխատաժողովներին: Բացի մասնագիտական ծրագրից, մասնակիցները հնարավորություն կունենան ծանոթանալ Հայաստանի հարուստ մշակույթին ու պատմությանը՝ այցելելով թանգարաններ և տեսարժան վայրեր։
Երկու կողմերի ուսանողների գնահատմամբ՝ սա լավ հնարավորություն է ճանաչել մեկը մյուսի ազգային մշակույթը, ինչը դիզայն մասնագիտության հիմքերից մեկն է: