Անահիտ Մանասյանը ՄԻՊ հաստատության շենքային պայմանների բարելավման անհրաժեշտություն է տեսնում
2 րոպեի ընթերցում
ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ։ Մարդու իրավունքների պաշտպանի արդյունավետ գործունեության տեսանկյունից շատ կարևոր է շենքային պայմանների համապատասխանությունը միջազգային չափանիշներին։ «Արմենպրես»-ի հաղորդմամբ՝ Հայաստանի մարդու իրավունքների պաշտպանի հաստատության հիմնադրման 20-ամյակին նվիրված համաժողովին այս մասին ասաց Մարդու իրավունքների պաշտպան Անահիտ Մանասյանը։
«Արձանագրում եմ, որ Հայաստանի մարդու իրավունքների պաշտպանի հաստատության շենքային պայմանները միանշանակ ունեն բարելավման անհրաժեշտություն։ Այս առումով բազմաթիվ քննարկումներ եմ ունեցել օրենսդիր և գործադիր իշխանության պաշտոնատար անձանց հետ և կարևոր եմ համարում, որ գործադիր իշխանությունը ոչ միայն ստանձնել է հանձնառություն լուծելու երկար տարիների պատմություն ունեցող այս խնդիրը, այլ ներկայում փաստացի գտնվում ենք այս գործընթացի իրականացման սկզբնական փուլում»,-ասաց Մանասյանը։
ՄԻՊ-ի խոսքով՝ միջազգային չափանիշների տեսանկյունից կարևոր է նաև Մարդու իրավունքների պաշտպանի հաստատության աշխատակիցների սոցիալական երաշխիքների և աշխատանքի վարձատրության բարձրացման ուղղությամբ համապատասխան քայլերի ձեռնարկումը։
«ՄԻՊ աշխատակիցների և վերաբերելի այլ բնագավառներում աշխատանքի և վարձատրության միջև ժամանակի ընթացքում առաջ եկած տարբերությունը մարտահրավերային է Մարդու իրավունքների պաշտպանության բնագավառում աշխատանքը պետության կողմից գրավիչ դարձնելու և այս հանգամանքը երաշխավորելու տեսանկյունից, ինչը, վստահ եմ, պետական իշխանությունը պետք է պատշաճ հասցեավորի»,-եզրափակեց Անահիտ Մանասյանը։