2 րոպեի ընթերցում
ԵՐԵՎԱՆ, 18 ՀՈԿՏԵՄԲԵՐԻ, ԱՐՄԵՆՊՐԵՍ: Եվրոպական խորհուրդը հայտարարել է ԵՄ-ին Վրաստանի անդամակցության գործընթացի փաստացի արգելափակման մասին՝ երկրին մեղադրելով եվրոպական արժեքների խախման մեջ։ «Արմենպրես»-ի փոխանցմամբ՝ այդ մասին ասված է հոկտեմբերի 17-ին Եվրոպական խորհրդի նիստից հետո հրապարակված ամփոփիչ փաստաթղթում։
«Եվրոպական խորհուրդը վերահաստատում է Միության պատրաստակամությունն՝ աջակցելու վրաց ժողովրդին իր եվրոպական ճանապարհին։ Միևնույն ժամանակ Խորհուրդը լուրջ մտահոգություն է հայտնում Վրաստանի կառավարության ուղեգծի վերաբերյալ, որն ընթանում է Եվրամիության հիմքում ընկած արժեքներին ու սկզբունքներին հակառակ։ Եվրոպական խորհուրդն ընդգծում է, որ գործողությունների նման ընթացքը վտանգի տակ է դնում Վրաստանի եվրոպական ուղին և դե ֆակտո կասեցնում անդամակցության գործընթացը», - ասված է փաստաթղթում։
Բրյուսելն ակնկալում է, որ «առաջիկա խորհրդարանական ընտրությունները կլինեն ազատ և արդար, միջազգային չափանիշներին համապատասխան և միջազգային ու տեղական դիտորդների համար ընտրություններին անարգել հետևելու հնարավորությամբ»։ Փաստաթղթում ընդգծվում է «ազատ, անկախ և բազմակարծիք ԶԼՄ-ների պաշտպանության անհրաժեշտությունը»:
Օրեր առաջ Եվրախորհրդարանի պատգամավորները ձայների 495 կողմ, 73 դեմ, 86 ձեռնպահ հարաբերակցությամբ ընդունել են բանաձև, որով պահանջում են սառեցնել պաշտոնական Թբիլիսիի եվրոպական ֆինանսավորումը՝ հայտարարելով, որ Վրաստանի ներկայիս նահանջը ժողովրդավարությունից կասեցնում է այդ երկրի ինտեգրումը Եվրամիությանը: Պատճառը Վրաստանում «Օտարերկրյա գործակալների մասին» և «Ընտանեկան արժեքների և անչափահասների պաշտպանության մասին» օրենքների ընդունումն է, որոնք Եվրոխորհրդարանը պահանջում է չեղարկել։
Վրաստանի իշխանություններն այս բանաձևը համարել էին անարդար՝ նշելով, որ այն արդյունավետ չի լինի։