2 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Եվրամիությունը ևս 30 միլիոն եվրո է հատկացրել Լիբանանին մարդասիրական օգնություն տրամադրելու համար՝ երկրի հարավում հակամարտության սրման կապակցությամբ։ Ընդհանուր առմամբ, ԵՄ հատկացումները հանրապետության բնակչության առավել կարիքավոր հատվածի համար 2024 թվականին գերազանցել են 100 միլիոն եվրոն։ «Արմենպրես»-ի փոխանցմամբ՝ այդ մասին հաղորդում է Եվրահանձնաժողովի մամուլի ծառայությունը։
Եվրահանձնաժողովի նախագահ Ուրսուլա ֆոն դեր Լայենը հայտնել է, որ «չափազանց անհանգստացած է Մերձավոր Արևելքում լարվածության սրումից»՝ նշելով, որ բոլոր կողմերը պետք է անեն առավելագույնը խաղաղ բնակչությանը պաշտպանելու համար։
«Մենք շարունակում ենք Լիբանանի հետ սահմանին և Գազայի հատվածում հրադադարի, ինչպես նաև բոլոր պատանդների ազատ արձակման կոչ անել», - ասել է ֆոն դեր Լայենը:
Մերձավոր Արևելքում իրավիճակը շարունակում է լարված մնալ: Իսրայելը սեպտեմբերի 23-ից ավիահարվածներ է հասցնում Լիբանանին, իսկ հոկտեմբերի 1-ին հայտարարել է այնտեղ ցամաքային գործողություն սկսելու մասին։ Ըստ Լիբանանի կառավարության՝ իսրայելական հարվածներից վերջին մեկ տարվա ընթացքում Լիբանանում գրեթե 1900 մարդ է զոհվել, ավելի քան 9000-ը՝ վիրավորվել, նրանց մեծ մասը՝ վերջին երկու շաբաթվա ընթացքում։ Լիբանանի վարչապետի պաշտոնակատար Նաջիբ Միքաթին հայտարարել է, որ Իսրայելի հարձակումների հետևանքով տեղահանվել է շուրջ 1,2 միլիոն լիբանանցի։