Վարչապետը Սեմ Սիմոնյանի և Էլի Աքիլյանի հետ քննարկել է ՀՀ-Սփյուռք կապերի ամրապնդման, ինքնության պահպանման, ՀՀ տնտեսության զարգացման հարցեր
1 րոպեի ընթերցում
ԵՐԵՎԱՆ, 30 ՍԵՊՏԵՄԲԵՐԻ, ԱՐՄԵՆՊՐԵՍ: Վարչապետ Նիկոլ Փաշինյանն ընդունել է «Թումո» կենտրոնի համահիմնադիր Սեմ Սիմոնյանին և ԱՄՆ-ում գործող Inet Technologies ընկերության համահիմնադիր Էլի Աքիլյանին:
Ինչպես «Արմենպրես»-ին տեղեկացրին ՀՀ վարչապետի աշխատակազմից, վարչապետը ողջունել է նրանց գործունեությունը մեր երկրում և ընդգծել «Թումո» կենտրոնների զարգացման ու բոլոր մարզերում նման կենտրոններ հիմնելու կարևորությունը: Նիկոլ Փաշինյանը նշել է, որ ՀՀ Կառավարության առաջնահերթություններից մեկը գիտելիքահեն տնտեսության զարգացումն է ու այդ համատեքստում կարևորել կրթական ոլորտում ծրագրերի իրականացումը:
Ըստ աղբյուրի՝ Սեմ Սիմոնյանը նշել է, որ իրենց նպատակն է «Թումո» կենտրոնների հիմնումը ողջ Հանրապետությունում և նշել ՀՀ Կառավարության հետ արդյունավետ համագործակցության փաստը: Ընդգծվել է, որ առաջիկայում ևս պատրաստ են նոր ծրագրերի իրականացման ուղղությամբ փոխգործակցության, այդ թվում՝ կրթության, մշակույթի բնագավառներում:
Նշվում է, որ զրուցակիցները մտքեր են փոխանակել Հայաստան-Սփյուռք հարաբերությունների ամրապնդման, ինքնության պահպանման, ՀՀ տնտեսության զարգացման հետագա քայլերի և այլ հարցերի շուրջ: