3 րոպեի ընթերցում
ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: «Դեպի ճամբար. հատուկ ջոկատ» գեղարվեստական ֆիլմը, որի գլխավոր հերոսները երեխաներն են, հոկտեմբերի 3-ից կլինի երևանյան կինոթատրոններում։
«Երեխաների համար կոնտենտ պատրաստելը բարդ է, և ոչ բոլորն են նման պատասխանատվություն ստանձնում։ Մենք վաղուց ունեցել ենք այդ համարձակությունը, քանի որ դերասանական դպրոց ունենք ու ամեն օր շփվում ենք երեխաների հետ։ Երեխաներին մոտ կանգնած լինելով՝ պատկերացնում ենք, թե ինչ պահանջներ ունեն նրանք և ինչ հետաքրքրություններ։ Մեզ համար ավելի հեշտ է ստեղծել բովանդակություն, որը հասկանալի կլինի փոքր տարիքի երեխաներին, դեռահասներին, սակայն այս ֆիլմն ընտանեկան դիտման համար է»,- «Արմենպրես»-ի հաղորդմամբ՝ նշում է «Դեպի ճամբար. հատուկ ջոկատ» ֆիլմի պրոդյուսեր, սցենարիստ, դերասան Գրիգոր Դանիելյանը:
Մինչ գեղարվեստական ֆիլմը շատերը դիտել են «Դեպի ճամբար» սերիալը։ Դանիելյանի խոսքով՝ կինոնկարը կարող են նայել նույնիսկ այն մարդիկ, որոնք ծանոթ չեն սերիալին։
«Սցենարը մշակեցինք այնպես, որ ոչ մի կերպ առնչություն չունենա սերիալի հետ։ Կերպարները պահպանվել են, կան նաև նոր հերոսներ։ Մեր թիմին միացել են դերասաններ Լևոն Հարությունյանը, Վաչե Երիցյանը, Լիլիթ Սարգսյանը, Յուլյա Ֆինկը, Սուրեն Թումասյանը, Լիլի Էլբակյանը, Սամվել Թոփալյանը, Տիգրան Գյուլամյանը, թիմ է վերադարձել Ռաֆայել Երանոսյանը»,-ասում է նա։
Ֆիլմը պատմում է մի աղջկա մասին, որը շատ կարևոր գործով վկայի դուստր է, այդ պատճառով նրան թաքցնում են ճամբարում: Կինոնկարի գլխավոր հերոսուհին Մանուշակ Անտոնյանն է, որը սովորել է Գրիգոր Դանիելյանի և Հռիփսիմե Ելինյանի «Տրիո» ստուդիոյում:
«Մանուշակ Անտոնյանը մեր դպրոցի սաներից է: Այս ֆիլմը մեր դպրոցի լավագույն հաշվետվությունն է, քանի որ փաստում է, որ մեր աշակերտներն իրենց սովորածը կարողանում են կիրառել պրակտիկորեն։ Ֆիլմում նկարահանվել են բացառապես մեր ստուդիայի աշակերտները, ինչը մեզ համար հպարտանալու առիթ է»,-շեշտում է Գրիգոր Դանիելյանը:
Ֆիլմի երևանյան պրեմիերայից հետո ցուցադրություններ են նախատեսվում Հայաստանի մարզերում, ԱՄՆ-ում, եվրոպական երկրներում և Ռուսաստանում։