2 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ։ Ռուսաստանի Դաշնությունն ու Չինաստանը քննարկել են Արկտիկայում էներգետիկայի, ներդրումների և տրանսպորտի ոլորտում համատեղ նախագծերի իրականացումը։
«Արմենպրես»-ի փոխանցմամբ՝ այս մասին հայտնել է ՌԴ ԱԳ նախարարությունը՝ հավելելով, որ մտքերի փոխանակումը տեղի է ունեցել Պեկինում ռուս-չինական արտաքին գործերի միջնախարարության խորհրդակցությունների շրջանակում, որոնք անցկացրել են ՌԴ ԱԳՆ հատուկ հանձնարարականներով դեսպան Նիկոլայ Կորչունովը և Չինաստանի ԱԳՆ-ի Պայմանագրի և իրավաբանական վարչության տնօրեն Մա Սինմինը։
«Կողմերը մանրամասն քննարկել են մեծ լայնություններում համատեղ նախագծերի իրականացումն, առաջին հերթին էներգետիկայի, ներդրումների, գիտության, տրանսպորտի, ներառյալ Հյուսիսային ծովային երթուղու ենթակառուցվածքի զարգացման և օգտագործման, ինչպես նաև Արկտիկական խորհրդի շրջանակներում հետագա փոխգործակցության հեռանկարները»,- հայտնել է ՌԴ ԱԳՆ-ն՝ նշելով, որ երկկողմ համագործակցությունը Արկտիկայի օրակարգի այս և այլ հրատապ հարցերի շուրջ կշարունակի ամրապնդվել:
ՌԴ ԱԳ նախարարությունը նաև հաղորդել է, որ երկու երկրների շահագրգիռ գերատեսչությունների և կազմակերպությունների ներկայացուցիչների մասնակցությամբ կայացել է մտքերի կառուցողական և առարկայական փոխանակում Արկտիկայի տարածաշրջանում նոր աշխարհաքաղաքական պայմաններում համապարփակ ոգով հետագա փոխգործակցության ուղիների վերաբերյալ։
Բացի այդ, պայմանավորվածություն է ձեռք բերվել խորհրդակցությունների հաջորդ փուլն անցկացնել 2025 թվականին Ռուսաստանում։