2025 թվականին ԲՏԱ ոլորտի զարգացման ռազմավարության նախնական տարբերակը կներկայացվի Կառավարությանը. նախարար
3 րոպեի ընթերցում
ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ։ Հայաստանի Հանրապետության բարձր տեխնոլոգիական և արդյունաբերության նախարարությունն արդեն իսկ սկսել է ոլորտի զարգացման ռազմավարության մշակումը, որի նախնական՝ սևագիր տարբերակը 2025 թվականի մայիս-հունիս ամիսներին արդեն պատրաստ կլինի և կներկայացվի Կառավարությանը։
«Արմենպրես»-ի հաղորդմամբ՝ այս մասին Համաշխարհային հայկական գագաթնաժողովի ընթացքում ասաց ՀՀ բարձր տոխնոլոգիական արդյունաբերության նախարար Մխիթար Հայրապետյանը՝ ներկայացնելով վերջին 2 տարվա ընթացքում ոլորտում իրականացված աշխատանքները և դրանց արդյունքները։
Նախարարը նշեց, որ կատարված աշխատանքը բավականին շատ է և շատ բարդ է հակիրճ կերպով ներկայացնել այն ամբողջ աշխատանքների ծավալը, որն իրականացվել է։
«Վերջին 8 ամիսներին մենք Կառավարության, այդ թվում՝ նաև իմ գործընկերների հետ ակտիվորեն լծվել ենք բարձր տեխնոլոգիական արդյունաբերության ոլորտը խթանող օրենսդրական աշխատանքներին, և կարող եմ ասել, որ ունենք նախագիծ, որն այս պահին շրջանառվում է Կառավարության տարբեր գերատեսչություններով, որից հետո Կառավարության համապատասխան որոշման արդյունքում այն կգնա Ազգային ժողով», - նշեց նախարարը՝ հավելելով, որ օրինագիծն իրենից ներկայացնում է մայր օրենք, որի անհրաժեշտությունը հատկապես վերջին տարիներին կենսական նշանակություն է ունեցել։
Նրա դիտարկմամբ՝ այդօրինակ նախաձեռնությունների, ինստիտուցիոնալ և երկարաժամկետ ներդրումների միջոցով փորձ է արվում խթանել բարձր տեխնոլոգիական արդյունաբերության ոլորտը Հայաստանում, ոլորտում գործունեություն իրականացնող մասնավոր ընկերություններին և անհատներին։
«Սրան զուգահեռ՝ մենք արդեն իսկ սկսել ենք ԲՏԱ ոլորտի զարգացման ռազմավարությունը և 2025 թվականի մայիս-հունիս ամիսներին սևագիր տարբերակն արդեն պատրաստ կլինի՝ ներկայացնելու Կառավարությանը։ Սրանով մենք նախ և առաջ մեզ համար տալիս ենք կարևորագույն սահմանումներ, թե ի՞նչ նկատի ունենք բարձր տեխնոլոգիական արդյունաբերություն ասելով: Սահմանում ենք այն ռազմավարական ուղղությունները, որոնք կունենան 2-3 հիմնական ուղղություններ: Հայաստանը կենտրոնանալու է այդ ուղղությունների վրա՝ հավակնելով դառնալ չեմպիոն և ասելիք ունենալու տեխնոլոգիական աշխարհում», - շեշտեց Մխիթար Հայրապետյանը՝ հավելելով, որ ԲՏԱ նախարարությունն, ընդհանուր առմամբ, ներառում է մի շարք այլ ոլորտներ՝ ընդհանուր թվայնացման ոլորտը, տիեզերական գործունեության ոլորտը, հեռահաղորդակցության ոլորտը, ռազմական արդյունաբերության ոլորտը։