Կարևոր է, որ պարեկային ոստիկանությունը կասկածելի ոչ մի իրավիճակի նկատմամբ չլինի անտարբեր․ վարչապետ
2 րոպեի ընթերցում
ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ։ Հայաստանի վարչապետ Նիկոլ Փաշինյանը հայտարարել է, որ պարեկային ոստիկանությունը չպետք է լինի իներտ, չպետք է անտարբեր լինի կասկածելի ոչ մի իրավիճակի նկատմամբ։
«Արմենպրես»-ի հաղորդմամբ՝ Նիկոլ Փաշինյանն այս մասին ասաց կառավարության նիստի ժամանակ։
«Կարծում եմ` պարեկային ոստիկանությունը մեր առաջնային աչքն է ընդհանրապես ամեն ինչի վերաբերյալ։ Շատ կարևոր է, որ պարեկային ոստիկանությունը կասկածելի ոչ մի իրավիճակի նկատմամբ չլինի անտարբեր։ Սա հայեցակարգային կարևոր հարց է, որովհետև պարեկային ոստիկանության ներդրման առաջնային նպատակը և իմաստը եղել է դա։ Պարեկային ոստիկանությունը չպետք է լինի իներտ»,- ասաց Փաշինյանը։
Նրա խոսքով՝ պարեկային ոստիկանությանը պետք է ուսուցանել, թե ինչպես պետք է տարբերել կասկածելի դեպքերը։
«Առանձնապես ծանր հանցագործությունների դեպքերի հետ կապված նաև պարեկային ոստիկանությունից մեր ակնկալիքները շարունակելու են մեծանալ։ Հիմա պարեկային ոստիկանությունը նոր չէ, և մենք պետք է ավելի մեծ ակնկալիքներ ունենանք։ Հանցավորության վերաբերյալ ընդհանուր վիճակագրության մեջ պարեկային ոստիկանության արդյունավետությունը պետք է արտահայտվի։ Մենք Հայաստանի ժողովրդին պետք է ունենանք շատ հստակ թվային բացատրություն, թե ինչո՞ւ ենք մի քանի տասնյակ միլիարդ դրամ ծախսել և նոր ինստիտուտ ստեղծել»,-ընդգծեց Փաշինյանը։