Փաշինյանը Հայաստանում անկախ դատական համակարգ ունենալը ծայրահեղ անհրաժեշտություն է համարում
3 րոպեի ընթերցում
![Փաշինյանը Հայաստանում անկախ դատական համակարգ ունենալը ծայրահեղ անհրաժեշտություն է համարում](http://armenpress.am/resized/480/storage/images/articles/2024/09/11/4zwyRUdybrFgWO8z8QTvoxYkqRcwDjjLkFUjJ7ZO.webp)
ԵՐԵՎԱՆ, 11 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի վարչապետ Նիկոլ Փաշինյանը չի համարում, թե այսօր Հայաստանում դատական համակարգը լիարժեք անկախ է, ուստի դրան հասնելը ծայրահեղ անհրաժեշտություն է:
«Արմենպրես»-ի հաղորդմամբ՝ Փաշինյանը նման դիրքորոշում հայտնեց ԱԺ–ում կառավարության հետ հարցուպատասխանին՝ անդրադառնալով «Հայաստան» խմբակցության պատգամավոր Լևոն Քոչարյանի բարձաձայնած՝ անկախ դատական համակարգ չունենալու, դատարանների որոշումների վրա լծակներ կիրառելու մեղադրանքներին:
«Իհարկե, Հայաստանում անկախ դատական համակարգ ունենալու պատասխանատվությունը կրում է ՀՀ կառավարությունը և խորհրդարանական մեծամասնությունը: Արդյոք ես կարծում եմ, որ այսօր Հայաստանում մենք ունենք լիարժեք անկախ դատական համակարգ. ոչ, չեմ կարծում, որ Հայաստանում ունենք լիարժեք դատական համակարգ»,–ասաց Փաշինյանը:
Դիմելով Լևոն Քոչարյանին՝ վարչապետն ասաց. «Դուք գիտեք, որ Դուք, ձեր խմբակցությունից մարդիկ, բազմաթիվ մարդիկ կան, որոնք առաջվա լծակները մինչև այսօր պահում են դատական համակարգի վրա»:
Նա հավելեց՝ ընդդիմադիր պատգամավորի բարձրաձայնած հարցերը հնչում են նաև կառավարող մեծամասնության ներկայացուցիչների կողմից:
Վարչապետի համոզմամբ՝ անկախ դատական համակարգ ունենալը մեկքայլանի գործողություն չէ: Նա այն համոզմանն է, որ Հայաստանում անկախ դատական համակարգի բացակայության սոցիալ–հոգեբանական արմատները գտնվում են Հայաստանի իրավաբանական կրթության տիրույթում:
«Հայաստանի անկախ դատական համակարգ ունենալը ծայրահեղ անհրաժեշտություն է ՀՀ հետագա զարգացման համար: Եթե մենք հետևողականորեն չգնանք անկախ դատական համակարգ ունենալու ճանապարհով, չենք կարող հաջողություն ունենալ»,–ասաց Փաշինյանը:
Ըստ նրա՝ կա մի փաստ, որը վկայում է, որ երկիրը, թեև ոչ ամենացանկալի արագությամբ, սակայն գնում է անկախ դատական համակարգ ունենալու ճանապարհով: Փաշինյանը նկատեց՝ դատական համակարգի որոշումներից հաճախ դժգոհ է մնում ընդդիմությունը, բայց նաև հաճախ դժգոհ է մնում կառավարող կուսակցությունը: Այս հարցում, ըստ նրա, ընդդիմությունն ու կառավարող մեծամասնությունը համագործակցելու մեծ տեղ ունեն: