2 րոպեի ընթերցում
ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանում իրավական հիմքեր են ստեղծվում սոցիալական աջակցությունների ոլորտում բարեփոխումների համար:
«Արմենպրես»-ի փոխանցմամբ՝ Սոցիալական աջակցության մասին օրենքի նախագիծն ու հարակից 15 օրենքում փոփոխությունների փաթեթը ԱԺ նիստում ներկայացրեց Աշխատանքի և սոցիալական հարցերի փոխնախարար Աննա Ժամակոչյանը:
«Սա հիմնարար ռեֆորմի փաթեթ է, իրավական բոլոր հիմքերն է ստեղծում սոցիալական աջակցությունների ոլորտում բարեփոխումներն ապահովելու համար»,-ասաց Ժամակոչյանը:
Նա ներկայացրեց, որ նախագծով առաջարկվել են սահմանել և կարգավորել սոցիալական աջակցության ոլորտի, սոցիալական ծառայությունների նոր տեսակներ, օրինակ՝ ընտանիքի կենսապահովման կայունացման օգնությունը, սոցիալ-հոգեբանական օգնությունը, բնակարանային կոմունալ ծառայությունների վճարումների նվազեցումը կամ հատուցումը, սոցիալական պատրոնաժը, ինտեգրմանը կամ վերաինտեգրմանն ուղղված օգնությունը, կենցաղային օգնությունը:
Սահմանվել է հրատապ արձագանք պահանջող իրավիճակ հասկացությունը և դրա հետ կապված սոցիալական ծառայությունների տրամադրման առանձնահատկությունները:
Սահմանվել է, որ 2029 թվականից հետո սոցիալական աշխատող կարող է հանդես գալ միայն սոցիալական աշխատանքի և հարակից ոլորտների բարձրագույն կրթություն ունեցող և հավաստագրված անձը: Ներդրվել է սոցիալական աշխատողների 3 տարին մեկ հավաստագրման ինստիտուտը: