Հայաստանի և Ադրբեջանի միջև սահմանազատման գործընթացում էական տեղաշարժ է արձանագրվել․ Նիկոլ Փաշինյան
2 րոպեի ընթերցում
ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ։ Հայաստանի վարչապետ Նիկոլ Փաշինյանը հայտարարել է Հայաստանի և Ադրբեջանի միջև սահմանազատման գործընթացում էական տեղաշարժի մասին։ «Արմենպրես»-ի փոխանցմամբ՝ վարչապետն այդ մասին խոսել է «Երևանյան երկխոսություն» խորագրով համաժողովի ժամանակ ունեցած ելույթում։
«Այդ տեղաշարժն արտահայտվում է նրանով, որ Հայաստանի ու Ադրբեջանի սահմանազատման հանձնաժողովները ստորագրեցին համատեղ գործունեության մասին կանոնակարգը։ Այդ կանոնակարգում արձանագրված է այն, ինչի շուրջ կողմերը հայտարարել էին դեռևս սույն թվականի ապրիլի 19-ին հանձնաժողովների 8-րդ հանդիպման արդյունքում հրապարակված հաղորդագրության մեջ։ Այսինքն, արձանագրված է Ալմա-Աթայի հռչակագիրը՝ որպես սահմանազատման գործընթացի բազային սկզբունք և արձանագրված է, որ կողմերը սահմանազատման գործընթացում առաջնորդվելու են Ալմա-Աթայի հռչակագրով»,- մանրամասնեց Փաշինյանը։
Վարչապետն ընդգծեց, որ Հայաստանում և Ադրբեջանում այս պահին ընթանում են կանոնակարգի ներքին համաձայնեցման ներպետական ընթացակարգերը։ «Համոզված եմ, որ Հայաստանում մենք ամեն ինչ կանենք այն լրումին հասցնելու համար։ Մեր կառավարությունն ընդունել է նախագիծը, այն ուղարկել է Սահմանադրական դատարան դրա՝ Սահմանադրությանը համապատասխանությունը ստուգելու համար»,- ասաց Նիկոլ Փաշինյանը։