Պատգամավորը հստակեցրել է, թե որ հարցերում Հայաստանը Ռուսաստանի հետ անհամաձայնություններ ունի
2 րոպեի ընթերցում
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Հայկական կողմը Ռուսաստանի նկատմամբ հռետորաբանությունը չի փոխել․ կան հարցեր, որոնց վերաբերյալ Հայաստանը սուր դիրքորոշումներ է հայտնել, կան նաև հարցեր, որոնց վերաբերյալ հարաբերությունները գործընկերային են:
«Արմենպրես»-ի փոխանցմամբ՝ այս մասին լրագրողների հետ զրույցում վստահեցրեց ԱԺ արտաքին հարաբերությունների հանձնաժողովի նախագահ Սարգիս Խանդանյանը՝ անդրադառնալով Հայաստանի իշխանության մոտ Ռուսաստանի նկատմամբ հռետորաբանության հնարավոր փոփոխության, մեղմացման վերաբերյալ հարցին:
«Այո, կան հարցեր, որոնց վերաբերյալ մենք սուր դիրքորոշումներ ենք հայտնել: Եվ կան հարցեր, որոնց վերաբերյալ կա ըմբռնում, կան գործընկերային հարաբերություններ: Ուստի, չեմ կարծում, թե աշխարհացունց բաներ են տեղի ունեցել, որի հետևանքով տոնայնություն կամ հռետորաբանություն է փոխվել: Կան հարցեր, որտեղ Հայաստանը դեռ ունի հարցադրումներ Ռուսաստանին: Դրանց շուրջ եղել են, կան ու, գուցե, էլի կլինեն սուր մեկնաբանություններ»,-ասաց Խանդանյանը:
Նա ընդգծեց, որ Հայաստանի և Ռուսաստանի հարաբերությունները միակողմանի չեն, բազմաոլորտ հարաբերություններ են, և տարբեր հարցերի շուրջ միշտ եղել են, կան ու կլինեն քննարկումներ:
«Ռուսաստանում կան պաշտոնյաներ, որոնք շարունակաբար խախտում են ոչ միայն դիվանագիտական էթիկայի կանոնները, այլ նաև կյանքի էթիկայի կանոնները: Վերջին շրջանի մի շարք ձևակերպումներ և մեկնաբանություններ Հայաստանի հասցեին եղել են շատ անհարգալից: Եվ դրանք, բնականաբար, արձագանքի են արժանացել»,-հավելեց նա:
Թե որ հարցերում Ռուսաստանի հետ անհամաձայնություն կա՝ Խանդանյանն ասաց. «Պաշտպանական, անվտանգային հարաբերություններում Ռուսաստանի կողմից իր պարտավորությունները չկատարելու: Թե՛ երկկողմ, թե՛ ՀԱՊԿ-ի շրջանակներում հիմնական մեծ հարցը, որը Հայաստանն ունեցել է և ունի, դրա հետ են կապված»:
