3 րոպեի ընթերցում
ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Ուսումնական տարվա մեկնարկի շրջանակում Երևանի դպրոցների շուրջ 500 առաջին դասարանցիներ դիտեցին «Օլիմպիկոս» մուլտֆիլմը:
«Արմենպրես»-ի փոխանցմամբ՝ միջոցառումը երեխաների համար կազմակերպել էին ԿԳՄՍ նախարարությունը, Երևանի քաղաքապետարանը և Կարեն Դեմիրճյանի անվան մարզահամերգային համալիրի տնօրինությունը: Երեխաներին ողջունեցին և բարի երթ մաղթեցին ԿԳՄՍ նախարարի տեղակալ Արաքսիա Սվաջյանը և Երևանի քաղաքապետի տեղակալ Լևոն Հովհաննիսյանը։
ԿԳՄՍ նախարարի տեղակալ Արաքսիա Սվաջյանը ողջունեց առաջին դասարանցիներին՝ նշելով, որ իրենց շատ բազմաբովանդակ ու բազմազբաղ ուսումնական տարի է սպասվում:
«Հույս ունեմ, որ բոլոր այն երեխաները ովքեր այսօր այստեղ են, կվայելեն մուլտֆիլմը և սա շատ դրական տպավորություններով մեկնարկ կլինի նոր ուսումնական տարվա համար: Շատ հաճախ երեխաները դպրոց հաճախելով սկսում են ձանձրանալ և չսիրել սովորելը, բայց ես հուսով եմ, որ բոլոր այն ծրագրերը, որ այսօր իրականացվում են դպրոցներում՝ երեխաների համար ստեղծելու են միջավայր, որը կդառնա խթան դպրոցը էլ ավելի շատ սիրելու համար:
Դրա մասին է վկայում նաև նախորդ ուսումնական տարվա ամփոփումը: Մենք նախորդ երկու շաբաթների ընթացքում բոլոր մարզերում շրջել ենք, ծանոթացել ենք նախորդ ուսումնական տարվա ընթացքում իրականացված նախագծային աշխատանքներին, ծրագրերին և ուրախությամբ ուզում եմ նշել, որ բոլոր դպրոցներում և՛ ուսուցիչները, և՛ աշակերտները փաստել են, որ նախորդ տարի նոր ուսումնական չափորոշչի ներդրումը դպրոցում մեծ ակտիվություն և հետաքրքրություն է բերել»,- ասաց ԿԳՄՍ նախարարի տեղակալը:
Անդրադառնալով մուլտֆիլմի ընտրությանը Սվաջյանը նշեց՝ առաջին դասարանցինը կդիտեն «Օլիմպիկոս» մուլտֆիլմը, որը երեխաներին կմոտիվացնի և իրենց ուժերին հավատալու, դրված նպատակների հետևից գնալու կարևոր մտքեր ու գաղափարներ կփոխանցի:
Երևանի փոխքաղաքապետ Լևոն Հովհաննիսյանը ընդգծեց՝ այս համատեղ նախագիծը իրականացվել է նոր ուսումնական տարվա մեկնարկին երեխաներին բարձր տրամադրություն և դրական լիցքեր փոխանցելու համար, քանի որ շատ են կարևորում, որպեսզի երեխաները իրենց դպրոցական տարիներից դրական հուշեր ունենան:
«ՀՀ կառավարությունը և Երևանի քաղաքապետարանը ամենօրյա աշխատանքի շնորհիվ ամեն ինչ անում է, որպեսզի երեխաների կրթություն ստանալու պայմանները՝ շենքային, գույքային և իհարկե բովանդակային մասով, գնալով բարելավվեն»,- եզրափակեց Հովհաննիսյանը: