Էյֆելյան աշտարակի վրա Օլիմպիական օղակները պահելու՝ Փարիզի քաղաքապետի որոշումը հակասական արձագանքների է արժանացել
1 րոպեի ընթերցում
![Էյֆելյան աշտարակի վրա Օլիմպիական օղակները պահելու՝ Փարիզի քաղաքապետի որոշումը հակասական արձագանքների է արժանացել](http://armenpress.am/resized/480/storage/images/articles/2024/09/02/ztAAN4SzBPbHwDCXMlhEkyr7Js8WZOiSbbvA1l62.webp)
ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ։ Փարիզի քաղաքապետ Ան Իդալգոն բուռն բանավեճերի առիթ է տվել՝ հայտարարելով, որ ցանկանում է ամառային Օլիմպիական խաղերի ավարտից հետո Էյֆելյան աշտարակի վրա թողնել Օլիմպիական օղակները։ «Արմենպրես»-ի փոխանցմամբ՝ այս մասին հաղորդում է BBC-ն։
«Որոշումը ես պետք է կայացնեմ, և ես ՄՕԿ-ի (Միջազգային օլիմպիական կոմիտե) հետ համաձայնություն ունեմ։ Այնպես որ, այո, դրանք կմնան Էյֆելյան աշտարակի վրա», - ասել է նա Ouest-France թերթին։
Որոշ փարիզցիներ սատարել են այդ որոշումը, բայց որոշներն էլ ասել են, որ դա վատ գաղափար է և «կպղծի» Ֆրանսիայի մայրաքաղաքի խորհրդանշական հուշարձանը։
Հինգ օղակները՝ 29 մ լայնությամբ, 15 մ բարձրությամբ և 30 տոննա քաշով, Էյֆելյան աշտարակի վրա տեղադրվել են նախքան հուլիսի 26-ին Փարիզի Օլիմպիական խաղերի բացումը։ Ակնկալվում էր, որ դրանք կապամոնտաժվեն Պարալիմպիկ խաղերի փակման արարողությունից հետո՝ սեպտեմբերի 8-ին:
Սակայն Իդալգոն հայտնել է, որ ցանկանում է պահել հինգ օղակները, որոնք խորհրդանշում են հինգ մարցամաքները։ Քաղաքապետը հավելել է, որ օղակները չափազանց ծանր են և ապագայում կփոխարինվեն ավելի թեթև տարբերակով։