Կան ձախողումներ, որոնց առիթով ընթանում են ուսումնասիրություններ. վարչապետը՝ ANIF-ի լուծարման մասին
2 րոպեի ընթերցում
![Կան ձախողումներ, որոնց առիթով ընթանում են ուսումնասիրություններ. վարչապետը՝ ANIF-ի լուծարման մասին](http://armenpress.am/resized/480/storage/images/articles/2024/08/31/I9MuSguMgoPl0psNOEWdhRXpmG1DDiIKRPZv0HtO.webp)
ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ: Հայաստանի պետական հետաքրքրությունների ֆոնդի (ANIF) հետ կապված եղել են ձախողումներ, որոնց առիթով այժմ ուսումնասիրություններ են ընթանում:
«Արմենպրես»-ի հաղորդմամբ՝ այս մասին ասուլիսում ասաց Հայաստանի վարչապետ Նիկոլ Փաշինյանը՝ անդրադառնալով ANIF-ի լուծարմանը:
«Այո, այդտեղ կան ձախողումներ: Եվ այդ ձախողումների առիթով կան ուսումնասիրություններ: Շարունակվում են ուսումնասիրությունները: Հույս ունեմ, որ այդ ուսումնասիրությունների արդյունքներով կստանանք պատասխաններ»,–ասաց Փաշինյանը:
Վարչապետը նկատեց, որ ցանկացած երկրում կան ձախողված գործընթացներ:
«Եթե ուզում ենք, որ որևէ պրոցես չձախողվի, ապա պետք է որևէ պրոցես չնախաձեռնենք: Իսկ դա իր հերթին նշանակում է ճահճացում»,–ասաց նա:
Վարչապետը ընգդծեց՝ պետք է աշխատել՝ հասկանալով, որ այդ աշխատանքը ոչ միայն բերելու է արդյունքներ, այլ նաև հետևանքներ: Ամեն առանձին դեպք պետք է ուսումնասիրվի:
«Ինչքանով, որ գիտեմ, այդ փաստի առիթով քրեական գործ կա հարուցված: Եթե չեմ սխալվում՝ այդ քրեական գործը հարուցված է նաև Պետական վերահսկողական ծառայության արած ուսումնասիրությունների հետևանքով, որը, հասկանալիորեն, տեղի է ունեցել իմ հանձնարարությամբ: Այո, ես կիսում եմ այդ մտահոգությունները: Եվ կարծում եմ, որ պետք է ստանանք պատասխաններ»,–նշեց Փաշինյանը: