Ատոմակայանի կանգի պատճառ է հանդիսացել կայծակի հարվածը
1 րոպեի ընթերցում
ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ: Հայկական ատոմակայանը էներգահամակարգից անջատվել է կայծակի հարվածի պատճառով:
«Արմենպրես»-ի հաղորդմամբ՝ այս մասին հայտնել են Տարածքային կառավարման և ենթակառուցվածքների նախարարությունից:
Օգոստոսի 30-ին` ժամը 21։55-ի սահմաններում Հայկական ատոմակայանը վթարային կանգառի ռեժիմով անջատվել է էներգահամակարգից։
Կանգի պատճառ է հանդիսացել կայծակի հարվածը, որի հետևանքով կայանի անվտանգության համակարգերը կայանը բերել են անվտանգ կանգառի ռեժիմի։
Անվտանգության համակարգերը գերզգայուն են և արձագանքում են ցանկացած իրավիճակի:
Նախարարությունից տեղեկացրել ենք, որ անձնակազմը զբաղված է կայանի վերաթողարկման աշխատանքներով։
«Սա ևս մեկ ապացույց է, որ վերջին տարիներին կատարված մեծածավալ արդիականացման աշխատանքները, այդ թվում անվտանգության համակարգերի վրա, եղել են արդյունավետ և տվել են ակնկալվող արդյունքը»,–նշել են գերատեսչությունից: