Մաշտոցի պողոտայում, Իսահակյան և Մոսկովյան փողոցներում ևս կառանձնացվեն ավտոբուսային գծեր
1 րոպեի ընթերցում
![Մաշտոցի պողոտայում, Իսահակյան և Մոսկովյան փողոցներում ևս կառանձնացվեն ավտոբուսային գծեր](http://armenpress.am/resized/480/storage/images/articles/2024/08/27/JKSwmD5ufV8TVbYEhmesGsqF9CmFJvjFxAaoGcZm.webp)
ԵՐԵՎԱՆ, 27 ՕԳՈՍՏՈՍԻ, ԱՐՄԵՆՊՐԵՍ: Երևանում Մաշտոցի պողոտայում, Իսահակյան և Մոսկովյան փողոցներում ևս կառանձնացվեն հասարակական տրանսպորտի համար երթևեկելի հատվածներ:
«Արմենպրես»-ի փոխանցմամբ՝ այս մասին լրագրողների հետ զրույցում ասաց Երևանի քաղաքապետ Տիգրան Ավինյանը:
Աբովյան փողոցում արդեն ավտոբուսային գիծը գծված է: «Մոսկովյան և Իսահակյան փողոցները դառնում են միակողմանի, այնտեղ նույնպես ունենում ենք ավտոբուսային գծեր, Մաշտոցի պողոտայում ևս ունենում ենք ավտոբուսային գծեր: Ավտոբուսին և առհասարակ հանրային տրանսպորտին տալիս ենք առավելություն: Սա այլընտրանք չունեցող ճանապարհ է, մարդիկ, որոնք երթևեկում են ավտոբուսով, պետք է միանշանակ ունենան այդ առավելությունն ու առաջնահերթությունը»,-ասաց Ավինյանը:
171 ավտոբուս, 15 տրոլեյբուս ուղևորվում է դեպի Հայաստան: Նախատեսվում է, որ Երևանում նոր ավտոբուսներն ու տրոլեյբուսները կլինեն մինչև հոկտեմբերի վերջ: