ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: Երևանում սահմանվելու են ավտոբուսային նոր երթուղիներ: Այդ մասին «Արմենպրես»-ի թղթակցին հայտնեց քաղաքապետ Տիգրան Ավինյանը:
«Չինաստանից արդեն Երևան են տեղափոխվում 15 տրոլեյբուս և 8.5 մետր երկարությամբ 171 ավտոբուս, որոնք, կարծում եմ, մոտ 1.5 ամսից կլինեն մեր քաղաքում: Բացի այդ, մինչև տարեվերջ պետք է ամբողջապես կայացնենք միասնական տոմսային համակարգը, որի համար նախատեսված բոլոր սարքավորումներն արդեն իսկ տեղադրված են և՛ մետրոպոլիտենում, և՛ ավտոբուսներում: Մնացել է իրականացնել ծրագրային որոշ աշխատանքներ: Նաև ավտոբուսային նոր գծեր են ստեղծվում Երևանում: Ծրագրային որոշ քարտեզներով արդեն իսկ հնարավոր է առցանց հետևել քաղաքային ողջ տրանսպորտի տեղաշարժին և տեղեկանալ, թե տվյալ ավտոբուսը քանի րոպեից կհասնի համապատասխան կանգառ: Հուսով եմ՝ ամբողջացնելով այս ծրագրերը՝ առաջիկայում կունենանք շատ ավելի բարվոք վիճակում գտնվող տրանսպորտային համակարգ»,- նշեց Տիգրան Ավինյանը: