Չինաստանը դադարեցրել է ԱՄՆ-ի հետ սպառազինությունների վերահսկման շուրջ խորհրդակցությունները
2 րոպեի ընթերցում
ԵՐԵՎԱՆ, 17 ՀՈՒԼԻՍԻ, ԱՐՄԵՆՊՐԵՍ: Չինաստանը որոշել է դադարեցնել ԱՄՆ-ի հետ սպառազինությունների վերահսկման և չտարածման շուրջ խորհրդակցությունները՝ ամերիկյան կողմից Թայվան կղզու վարչակազմին զենքի վաճառքի պատճառով։ «Արմենպրես»-ի փոխանցմամբ՝ այս մասին ճեպազրույցի ընթացքում հայտնել է Չինաստանի արտաքին գործերի նախարարության պաշտոնական ներկայացուցիչ Լին Ցզյանը։
«Որոշակի ժամանակամիջոցում ԱՄՆ-ն շարունակել է զենքի վաճառքը Թայվանի վարչակազմին, չնայած Չինաստանի խիստ հակազդեցությանը և բազմիցս կրկնվող բանակցություններին.... Չինաստանը որոշել է դադարեցնել ԱՄՆ-ի հետ սպառազինությունների վերահսկման և չտարածման շուրջ խորհրդակցությունների հաջորդ փուլը», - նրա խոսքերն է մեջբերում ՏԱՍՍ-ը։
Դիվանագետը կատարվածի պատասխանատվությունը բարդել է ամերիկյան կողմի վրա և ընդգծել Պեկինի պատրաստակամությունը՝ պահպանելու համապատասխան շփումները Վաշինգտոնի հետ «փոխադարձ հարգանքի, խաղաղ գոյակցության և փոխշահավետ համագործակցության հիման վրա»։ Նա Միացյալ Նահանգներին կոչ է արել «հարգել Չինաստանի հիմնական շահերը և ստեղծել երկու կողմերի միջև երկխոսության և խորհրդակցությունների համար անհրաժեշտ պայմաններ»:
Չինաստանի արտաքին գործերի նախարարության գնահատմամբ՝ կղզուն ամերիկյան ռազմական մատակարարումների ընդհանուր գումարը մի քանի տարում գերազանցել է 70 միլիարդ դոլարը: