Ռեստավրատորի օրվան նվիրված միջոցառումների շրջանակում ՌԴ-ում ներկայացվել է «ՀՀ պատմության և մշակույթի անշարժ հուշարձանների վերականգնումը» զեկույցը
2 րոպեի ընթերցում
![Ռեստավրատորի օրվան նվիրված միջոցառումների շրջանակում ՌԴ-ում ներկայացվել է «ՀՀ պատմության և մշակույթի անշարժ հուշարձանների վերականգնումը» զեկույցը](http://armenpress.am/resized/480/storage/images/articles/2024/07/04/bwbtQBsOicMPzOI2u0MtmjB6eeiE2NtqXY3wPjIj.webp)
ԵՐԵՎԱՆ, 4 ՀՈՒԼԻՍԻ, ԱՐՄԵՆՊՐԵՍ։ Ռուսաստանի Դաշնության Սանկտ Պետերբուրգ քաղաքում հուլիսի 1-6-ն անցկացվում են Ռեստավրատորի օրվան նվիրված միջոցառումները, որին մասնակցության հրավեր է ստացել նաև Հայաստանի Հանրապետության կրթության, գիտության, մշակույթի և սպորտի նախարարությունը:
Ինչպես «Արմենպրես»-ը տեղեկանում է ՀՀ ԿԳՄՍ նախարարության տարածած հաղորդագրությունից, միջոցառումների շրջանակում տարբեր երկրների պատմության և մշակույթի հուշարձանների պահպանության ոլորտի մասնագետները հանդես են եկել տարբեր զեկույցներով՝ ներկայացնելով գլխավորապես վերականգնման տեսական և գործնական փորձի փոխանակումը:
Հեռավար ձևաչափով ելույթով հանդես է եկել նաև ՀՀ ԿԳՄՍ նախարարության պատմության և մշակույթի հուշարձանների պահպանության վարչության պետի տեղակալ Լուսինե Իգիթյանը՝ ներկայացնելով «ՀՀ պատմության և մշակույթի անշարժ հուշարձանների վերականգնումը» թեմայով զեկույցը: Այն ներառում էր ՀՀ պատմության և մշակույթի անշարժ հուշարձանների տեսակները, դրանց ամրակայման, նորոգման և վերականգնման իրավական գործընթացը, բուն վերականգնումը հնագիտական, պատմական, քաղաքաշինական և մոնումենտալ հուշարձաններում։ Միաժամանակ ելույթում կարևորվել է պետություն-մասնավոր և այլ երկրների մասնագետների հետ համագործակցությունը։
Գործընկերները հատկապես հետաքրքրվել են Հայաստանում վաղմիջնադարյան և քաղաքաշինական հուշարձանների վերականգնման գործընթացով:
Հարցուպատասխանի միջոցով քննարկվել են մասնագիտական հետաքրքրություն ներկայացնող այլ հարցեր։