Գեղարքունիքի մարզպետ Կարեն Սարգսյանը շնորհավորել է միջազգային առաջնություններում հաղթած մարզիկներին
2 րոպեի ընթերցում
![Գեղարքունիքի մարզպետ Կարեն Սարգսյանը շնորհավորել է միջազգային առաջնություններում հաղթած մարզիկներին](http://armenpress.am/resized/480/storage/images/articles/2024/07/04/QSxjGyd24CCasC80q3t29nE7FwT43dmLwSMYdjue.webp)
ԳԱՎԱՌ, 4 ՀՈՒԼԻՍԻ, ԱՐՄԵՆՊՐԵՍ։ Գեղարքունիքի մարզպետ Կարեն Սարգսյանն ընդունել և ՀՀ Գեղարքունիքի մարզպետի շնորհակալագրով խրախուսել է մարզից միջազգային մրցաշարերում հաղթող ճանաչված մարզիկներին։
Ինչպես «Արմենպրես»-ը տեղեկացավ Գեղարքունիքի մարզպետի աշխատակազմից, մարզպետը շնորհակալագիր է հանձնել Մարտունու Սմբատ Մհերյանի անվան մանկապատանեկան մարզադպրոցի սան, բռնցքամարտի Եվրոպայի չեմպիոն, 48 կգ քաշային կարգում ոսկե մեդալակիր Սիմոն Սիմոնյանին, նրա մարզիչներ Գագիկ Սարգսյանին և Գևորգ Սարգսյանին, Սևանի Նորիկ Դագարյանի անվան մանկապատանեկան մարզադպրոցի սան, ծանրամարտի աշխարհի առաջնության 61 կգ քաշային կարգում ոսկե մեդալակիր Հովհաննես Հովհաննիսյանին, ծանրամարտի 71 կգ քաշային կարգում բրոնզե մեդալակիր Ալինա Սուքիասյանին և նրանց մարզիչ Գառնիկ Աբրահամյանին, Եվրոպայի պարաբազկամարտի առաջնության 65 կգ քաշային կարգում ոսկե մեդալակիր, նորատուսցի Գուրգեն Անտոնյանին։
Մարզպետը շնորհավորել է մարզիկներին և նրանց մարզիչներին՝ ձեռք բերած հաղթանակների համար, մաղթել նրանց նորանոր հաջողություններ ու հաղթանակներ մարզական և անձնական կյանքում։
Կարեն Սարգսյանը կարևորել է Գեղարքունիքի մարզական կյանքում նման հաղթանակների գրանցումը, ինչն արդյունք է ջանադիր ու նպատակամղված աշխատանքի։
Անմիջական զրույցի ընթացքում պատանի մարզիկները և նրանց մարզիչները խոսել են իրենց մարզումների, հաջողությունների, հեռանկարային ծրագրերի մասին՝ հրատապ համարելով իրենց մարզասրահներում հատկապես մարզական գույքի թարմացման խնդիրը։
Գեղարքունիքի մարզպետը պատրաստակամություն է հայտնել՝ աջակցել խմբակներին անհրաժեշտ գույքի ձեռքբերման հարցում և միաժամանակ տեղեկացրել, որ պետական աջակցությամբ առաջիկայում նախատեսվում է մարզի բոլոր խոշորացված համայնքային կենտրոններում կառուցել նոր մարզադահլիճներ և դրանք ապահովել ժամանակակից բոլոր պայմաններով։
Խոսրով Խլղաթյան