Մետրոյի «Աջափնյակ» կայարանի շինարարությունը պետք է իրականացվի սահմանված ժամկետներում․ Ավինյան
3 րոպեի ընթերցում
![Մետրոյի «Աջափնյակ» կայարանի շինարարությունը պետք է իրականացվի սահմանված ժամկետներում․ Ավինյան](http://armenpress.am/resized/480/storage/images/articles/2024/07/01/j1t2ZCkQIj8u255TIsM4kfrmbhqTrYE8D8TbPTVk.webp)
ԵՐԵՎԱՆ, 1 ՀՈՒԼԻՍԻ, ԱՐՄԵՆՊՐԵՍ: Մետրոյի «Աջափնյակ» կայարանի շինարարությունը նախատեսվում է սկսել 2026 թվականի կեսերին: Նախագծի համաձայն՝ այն պետք է ավարտվի չորս տարում: «Արմենպրես»-ի հաղորդմամբ՝ այդ մասին հայտարարվեց Երևանի քաղաքապետարանի գործակարգավարական խորհրդակցության ընթացքում:
Կայարանի կառուցման նախագծային աշխատանքների ժամանակացույցի վերաբերյալ զեկույցում նշվեց, որ նախնական գնահատմամբ՝ շինարարությունը կարող է ընթանալ մինչև 2030-2032 թվականները:
«Դա խոշորացված ժամանակացույցն է, որը նաև Հանրային ներդրումային կոմիտեի շրջանակներում վերջերս քննարկվել է վարչապետի ղեկավարությամբ կայացած նիստում: Ժամանակացույցում հաշվի են առնված բոլոր հնարավոր ռիսկերը, ընթացիկ շեղումները և այլն: Բայց ունենք 2024-25 թվականների համար կազմված ավելի դետալացված աշխատանքային ծրագիր, որով փորձում ենք առաջնորդվել: Այն էապես կախված է լինելու նրանից, թե ինչ ֆինանսավորման աղբյուր է հաստատվելու: Հանրային ներդրումային կոմիտեի արձանագրությունն արդեն պաշտոնապես ստացել ենք: Հանրային ներդրումային կոմիտեում որոշում է կայացվել, որ մետրոյի «Աջափնյակ» կայարանի հաշվարկն անենք, այսինքն՝ գնահատենք տնտեսական արդյունավետության նորման ու մեկ անգամ ևս Հանրային ներդրումային կոմիտե գնանք՝ ծրագիրը հաստատելու և ֆինանսավորման շուրջ բանակցելու համար: Այս պահին այդ աշխատանքներն ենք իրականացնում մեր ռեսուրսներով: Հուսով ենք ավարտել ամենաուշը օգոստոսին»,- նշվեց զեկույցում:
Հաղորդվեց նաև, որ ՇՄԱԳ փորձաքննությունն արդեն ընթացքում է. այն նախատեսվում է ավարտել այս տարվա հոկտեմբերին: Դրան կհաջորդի պետական համալիր փորձաքննությունը, որը կիրականացվի արդեն 2025 թվականին: Հիմնական մրցութային գործընթացները ծրագրվում է ավարտել 2025 թվականին, որպեսզի մյուս տարվա կեսից տրվի շինարարության մեկնարկը: Դա լավատեսական իրատեսական սցենարն է, որը կախված է լինելու ֆինանսավորման աղբյուրից:
Քաղաքապետ Տիգրան Ավինյանը հիշեցրեց, որ շինարարությունը պետք է ավարտվի մեկնարկից 4 տարի անց և հորդորեց չքննարկել հավելյալ վատատեսական սցենարներ:
«Ինձ համար մի քիչ տարակուսելի են փորձաքննությունների՝ այսքան երկար տևելը: Ըստ նախագծի՝ շինարարության համար նախատեսված ժամկետը 4 տարի է: Խոստացել ենք կառուցել «Աջափնյակ» կայարանը և այն կառուցվելու է։ Խնդրում եմ՝ ինձ պարբերաբար տեղյակ պահեք, որովհետև գործընթացը չի կարելի բյուրոկրատական ընթացքին թողնել: Այդ դեպքում նախագիծը դանդաղորեն կմարի»,- նշեց քաղաքապետը: