Podcast-Հարց բժշկին. ինչպե՞ս պաշտպանվել միջատների և սողունների խայթոցներից. մանրամասնում է մասնագետը
3 րոպեի ընթերցում
ԵՐԵՎԱՆ, 24, ՀՈՒՆԻՍԻ, ԱՐՄԵՆՊՐԵՍ։ Միջատների ու սողունների խայթոցները մի շարք դեպքերում կարող են ալերգիաների, թունավորումների, և որոշ դեպքերում՝ որոշակի հիվանդությունների առաջացման պատճառ դառնալ։ Միջատներն ու սողունները սովորաբար ակտիվանում են ամռանը, ինչի հետևանքով նրանց հետ չառնչվելն ու նրանց խայթոցներից զերծ մնալը դառնում է անհնար: Սակայն ճիշտ առաջին օգնություն ցուցաբերելով և ժամանակին մասնագետ-բժշկին այցելելով՝ կարելի է խուսափել մի շարք բարդություններից: Խայթոցների տեսակների, դրանից առաջացող հետևանքների և առաջարկվող լուծումների մասին՝ «Արմենպրես»-ի «Հարց բժշկին» նախագծի հերթական հաղորդման շրջանակում զրուցել ենք «Մուրացան» համալսարանական հիվանդանոցի թունաբանության և մանկական վերակենդանացման կլինիկայի բժիշկ, ԵՊԲՀ ռազմադաշտային թերապիայի ամբիոնի դասախոս Ռուզաննա Խաչիկյանի հետ:
Բժիշկը նշեց, որ խայթոցներից առաջացած տեղային երևույթներն են ցավը, այտուցը, կարմրածությունը, քորը և այլն։ Սակայն, ըստ նրա, միջատների խայթոցը կարող է առաջացնել անգամ կյանքին վտանգ սպառնող երևույթներ, շոկ, շնչահեղձումներ և այլն:
Մասնագետը ցանկացած տիպի խայթոցի դեպքում խորհուրդ տվեց հոսող ջրով առաջնայինը լվանալ խայթոցի տեղը, դնել սառը թրջոց կամ սառույցի կտոր, օգտագործել հատուկ սառեցնող, հանգստացնող և հակաալերգիկ դեղամիջոցներ։
«Եթե քորը և այտուցը չեն անցնում առաջիկա ժամերի ընթացքում, ապա անհրաժեշտ է դիմել բժշկի: Իսկ ալերգիկ երևույթների առկայության դեպքում անհրաժեշտ է անհապաղ դիմել բժշկի՝ կյանքին սպառնացող խնդիրներից խուսափելու համար»,-նշեց բժիշկը։
Կան արդյո՞ք Հայաստանում միջատներ, որոնց խայթոցը շատ թունավոր է և կարող է մահացու լինել: Ինչպես հասկանալ արդյո՞ք ալերգիկ դրսևորումները և նմանատիպ ռեակցիաները առաջացել է խայթոցից։ Ի՞նչ անել մոծակի խայթոցների դեպքում: Ինչպե՞ս պաշտպանվել, և առաջինը ի՞նչ անել օձի և կարիճի խայթոցների պարագայում:
Այս և մի շարք այլ հարցերին ու մասնագետի կողմից առաջարկվող լուծումներին առաջարկում ենք ծանոթանալ՝ լսելով փոդքաստը:
Գայանե Գաբոյան
Լսեք նաև այլ թեմաներով Podcast-ները