Չինաստանի հետ հարաբերությունները ՀՀ-ի արտաքին քաղաքականության կարեւոր առաջնահերթություններից են. Հակոբ Արշակյանը՝ Լոու Ցինծյանին
3 րոպեի ընթերցում
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ։ Հայաստանի Հանրապետության ԱԺ նախագահի տեղակալ, Հայաստան-Չինաստան բարեկամական խմբի ղեկավար Հակոբ Արշակյանի գլխավորած պատվիրակությունը Պեկինում հանդիպել է Չինաստանի Ժողովրդական ներկայացուցիչների համաչինական ժողովի արտաքին հարաբերությունների հանձնաժողովի նախագահ, Չինաստան-Հայաստան բարեկամական խմբի ղեկավար Լոու Ցինծյանի հետ:
«Հայաստանի Հանրապետությունը Չինաստանի հետ հարաբերությունները դիտարկում է որպես իր արտաքին քաղաքականության կարեւոր առաջնահերթություններից մեկը: Այն ընդգրկված է ՀՀ կառավարության 2021-2026 թվականների ծրագրում»,- «Արմենպրես»-ի փոխանցմամբ՝ նշել է Հակոբ Արշակյանը:
ԱԺ փոխնախագահը ներկայացրել է Հայաստան-Ադրբեջան խաղաղության գործընթացը եւ տարածաշրջանային զարգացումները, Ալմա-Աթայի հռչակագրի հիման վրա իրականացվող սահմանազատման եւ սահմանագծման մասին ձեռք բերված պայմանավորվածությունները:
«Մեր տարածաշրջանին անհրաժեշտ է երկարաժամկետ խաղաղություն: Խաղաղության օրակարգը մեր տարածաշրջանում այլընտրանք չունի: Տրանսպորտային ենթակառուցվածքների ապաշրջափակումը կարեւոր գործոն է տարածաշրջանում կայուն եւ երկարատեւ խաղաղության հաստատման համար: «Խաղաղության խաչմերուկ» նախագիծը կծառայի ոչ միայն մեր տարածաշրջանին, այլ նաեւ հյուսիսը հարավին եւ արեւելքն արեւմուտքին կապող միջազգային լոգիստիկ ծրագրերին»,- նշել է ԱԺ նախագահի տեղակալը:
ՉԺՀ Ժողովրդական ներկայացուցիչների համաչինական ժողովի արտաքին հարաբերությունների հանձնաժողովի նախագահ, Չինաստան-Հայաստան բարեկամական խմբի ղեկավար Լոու Ցինծյանը, անդրադառնալով մեր տարածաշրջանում երկարաժամկետ խաղաղություն հաստատման անհրաժեշտությանը, նշել է, որ Չինաստանը հարգում է Հայաստանի տարածքային ամբողջականությունն ու ինքնիշխանությունը, աջակցում խնդիրների խաղաղ կարգավորման գործընթացին:
Հանդիպմանը քննարկվել են ճանապարհաշինության, էներգետիկայի, բարձր տեխնոլոգիաների զարգացմանն ուղղված խնդիրները: Մեծապես կարեւորվել են տրանսպորտային հաղորդակցության ոլորտում չինական Չինաստան-Հայաստան ուղիղ ավիաչվերթների գործարկումը (ինչը կարեւոր է զբոսաշրջության ոլորտում հետագա համագործակցության խորացման տեսանկյունից), ինչպես նաեւ ուղեւորների եւ բեռների միջազգային տրանսպորտային փոխադրումները:
Ընդգծվել են հայկական արտադրանքների՝ Չինաստանում ներկայացվածության խրախուսման մեխանիզմները, Չինաստանում անցկացվող ցուցահանդեսներին հայ տնտեսավարողների մասնակցությունը եւ ապրանքների առկայությունը:
Հանդիպմանը կարեւորվել է Չինաստանի եւ Հայաստանի միջեւ հարաբերությունների զարգացումը: