388.33
Պուտինը պետական այցով ժամանել է Վիետնամ
1 րոպեի ընթերցում
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: Ռուսաստանի նախագահ Վլադիմիր Պուտինը ժամանել է Վիետնամի մայրաքաղաք Հանոյի նախագահական պալատ։ Նրան դիմավորել է Վիետնամի նախագահ Թո Լամը։ Կողմերն արդեն սկսել են երկկողմ բանակցությունները։ «Արմենպրես»-ի փոխանցմամբ՝ այս մասին հաղորդում է «Ինտերֆաքս» գործակալությունը։
Նախքան բանակցությունների մեկնարկը երկու երկրների ղեկավարները լուսանկարվել են պետական դրոշների ֆոնին, ինչպես նաև կարճ շփում են ունեցել։
Բանակցություններից հետո տեղի կունենա ստորագրված փաստաթղթերի փոխանակման արարողություն, և երկու նախագահները հայտարարություններ կանեն լրատվամիջոցների համար։
Վիետնամ այցի ընթացքում, ըստ ՏԱՍՍ-ի, Պուտինը, բացի նախագահից, բանակցություններ կվարի Վիետնամի այլ բարձրաստիճան պաշտոնյաների՝ Կոմունիստական կուսակցության կենտրոնական կոմիտեի գլխավոր քարտուղար Նգուեն Ֆու Չոնգի, վարչապետ Ֆամ Մին Չինի և Ազգային ժողովի նախագահ Չրան Թան Մանի հետ:
Նախատեսվում է քննարկել ռուս-վիետնամական ռազմավարական գործընկերության հարցերի ամբողջ սպեկտրը։
Նախքան Վիետնամ մեկնելը Պուտինը պետական այցով գտնվում էր Հյուսիսային Կորեայում։
